Lawngtlai dist-ah thubuai ziahluh a pung

Nimin khan Lawngtlai SP PC Lalchunglura kaihhruaiin, a pisaah Crime Review Meeting neih a ni a, Addl SP, SDPO bakah Lawngtlai khawchhunga police officer eng emaw zat an tel bakah Lawngtlai khaw pawn aṭangin he meeting hi online-in an rawn zawm ve. He hunah hian Lawngtlai district-ah thubuai ziahluh a pung tih tarlan a ni.

Lawngtlai SP chuan police officer-te chu mipui rawngbawltu an nih angin ṭanpuina beiseia an hnena kalte tibeidawng lo a, a theih chin china an lungawina an zawnsak a ṭulzia a sawi.

Ṭhutkhawmah hian kum 2025 chhunga thubuai ziahluh leh kumin April, 2026 thlenga thubuai ziahluhte khaikhin leh zirho a ni. Nikum 2025 chhung khan thubuai 69 ziahluh a ni.

January 1, 2025 aṭanga April 7, 2025 inkarah thubuai 19 chauh ziahluh a nih laiin January 1 2026 leh April 7, 2026 inkarah thubuai 38 ziahluh a nih tawh thu tarlan a ni.

Case pending leh an pending chhante sawi ho a ni. Lawngtlai SP chuan investigating officer-te an case-ah theihtawp chhuah zel tura a fuih bakah, officer dangte pawh inrawnkuala theihtawp inchhuahpui zel turin a hrilh.