MSSC Golden Jubilee ropui takin an lawm

Mizoram State Sports Council chuan April 20, Thawhṭanni tlai khan R. Dengṭhuama Stadium, Mualpuiah ropui takin ruaipui nen Golden Jubilee an lawm a, sports association hrang hrang hruaitute an kal ṭha hle. MSSC hnathawh zarah kum 50 chhungin Mizoramin infiamnaah nasa takin hma a sawn a ni.

Din ṭan dan

Mizoram sorkar chuan April 20, 1976 khan Executive Order hmangin Mizoram State Sports Council a din a, kum sawmhnih paruk hnu, kum 2002 khan Mizoram Legislative Assembly chuan Mizoram State Sports Council Act, 2002 pawmin, Council chu sports inrelbawlnaa thuneihna sang tak neiin a siam ta a, ‘Mizo Infiammite Inpui’ tih mai turin a indin nghet chho ve ta zel a ni.

MSSC president hmasa ber chu Dr. H. Thansanga (Minister i/c Education) a ni a, Lal Thanhawla chu vice president hmasa ber niin Zolura (Special Officer for Scouts and Guides & Youth Welfare Activities) chu secretary hmasa ber a ni thung.

Kum 50 a ral meuh chuan Council hian president 19, vice president 12, secretary 12, joint secretary pariat, treasurer pasarih leh finance secretary paruk a nei tawh a, Council member phei chu za chuang an awm tawh. Chutihrualin Council hian kum 50 ral hnuah anmahni pualin office building a la nei lo.

Infiammite banah kai

India ramin Olympic 2036 thlen tumin hma a la mek a, chumi thlir chung chuan Mizoram sawrkar flagship programme ‘The Mizoram Bana Kaih (Handholding) Policy 2024’ hnuaiah ‘Empowering Mizoram Sports (EMS)’ duan a ni. Olympic 2036 bakah khawvel pum huap inelnaa Mizoramin India ram aiawh tur infiammi tam thei ang ber a chher chhuah theihna tura hma lakna a ni tel bawk.

Mizoram sorkar chuan EMS kalpui nan hian nikum khan MSSC hnenah cheng vaibelchhe 2.5 a pe a, kuminah cheng vaibelchhe 2.50 dang a pe leh tawh bawk. Mizote thiam zawng, khawvel huapa India a ṭhatna ni bawk (Olympic qualification hnaihna nia ngaih) sports discipline-te duat tura hmalak a ni a, discipline dangte chu an kal ngaiin an kal reng thoin thlauhthlak an ni dawn an ni lo.

EMS hnuaia pawimawh hmasak discipline pariat thlante chu archery, badminton, boxing, hockey, judo, taekwondo, weightlifting leh wrestling te an ni. MSSC hian Olympic 2036 thlirin hma la chho mek a, hlawhtlinna/hmasawnna a awm em tih erawh hunin a rawn hril ang.

MSSC Award 2025

MSSC Golden Jubilee lawm zan hian MSSC Award 2025 sem a ni a, Lal Thanhawla hnenah Lifetime Achievement Award hlan a ni. Mizoram Chief Minister hlui hian Mizorama infiamnain hma a sawn theih nan sports association hrang hrangah hma a la nasa a, MSSC-ah pawh hian president leh vice president hna a chelh tawh.

Kum 2025 bika sportsman of the year atan badminton player C. Lalramsanga thlan a ni a, Durtlang rawlthar Ramsanga hian India ramah Mizoram tan badminton inelnaah kawng a sial kaw nasa hle. Ramsanga ang thoa shuttler ṭha H. Lalṭhazuala leh Lalrempuii te chu mipa leh hmeichhia-ah most promising sports person of the year-ah thlan a ni.

India ram pum huap inelnaah Mizoram badminton player te an che ṭha a, mimal lawmman pawh an hui hnem. MSSC sportswoman of the year dawngtu erawh India hockey team-a player pawimawh Lalremsiami a ni thung.