Kan beisei aia ṭha vote a tla - SEC
State election commissioner (SEC) Dr H Lalthlangliana chuan, Aizawl Municipal Corporation (AMC) inthlanpui tluang taka neih a nih thu leh, an beisei aia ṭha vote a tlak thu a sawi.
Vanglaini palai zawhna chhangin SEC chuan, "State Election Commission lamin kan fang kual a, sector magistrate-te leh official dangte'n an fang kual bawk a, kan beisei aia ṭha mahin duty-te an thawk a, hmun ṭhenkhatah EVM chiang lo awm mah se, harsatna lian tham a awm lo. Voter turn out a ṭha thawkhat a, kan beisei aia sang mah a ni a, vote thlaktute zawng zawng chungah kan lawm hle a ni," a ti.
Dr H Lalthlangliana chuan, AMC inthlanah hian Mizoram People Forum (MPF) lam duty tura an beisei thu sawiin, "MPF-teah beisei nei tho mah ila, kan beisei aia nasain an active a, kan lawm hle," a ti a; MPF ṭhahnemngaihna avangin inthlan tluang taka neih a nih thu a sawi.
Commissioner chuan, electoral roll-a awm tura inngaia vote thlak tuma kal, AMC electoral roll-a awm si lo an awm nual thu sawiin, "Vote thlak ngai pawimawha vote thlak tum mi ṭhenkhatin vote an thlak thei lo hi a pawi kan ti a, thupha kan chawi a ni," a ti a; AMC electoral roll chungchangah dan siamṭhaa tihdanglam ngaite a ṭha zawk tura tihdanglam an tum tur thu a sawi.