AR chhuahsan ramah thing kit tawh rih lo turin sorkar hriattir

Gauhati High Court chuan April 20, Thawhṭanni khan thupek (order) chhuahin, Bazar Bungkawn leh Treasury Square inkar kawng zauhna atan Assam Rifles chhuahsan ram huam chhungah thing kit tawh rih lo turin Mizoram sorkar a hriattir.

Assam Rifles chhuahsan tak hmuna thing kih chungchangah Gauhati High Court chuan thubuai PIL (Suo Moto)/1/2026 a siam a; judge pahnih Justice Michael Zothankhuma leh Justice Kaushik Goswami te bench chuan April 20, Thawhṭanni khan a ngaihtuah.

High Court chuan April 20, 2026 khan order chhuahin, thuleh awm hma chu Aizawla Assam Rifles chhuahsan ram chhungah thing kit tawh lo turin Mizoram sorkar a hriattir a; AR chhuahsan ram chhunga thing upa tawh tak takte kih a ṭul chhan sawifiah turin a ti bawk. Thubuai hi May 18, 2026-ah ngaihtuah leh tura tih a ni.

Gauhati High Court order-a tarlan danin, Mizoram sorkarin Bungkawn - Treasury Square inkar kawng chu meter 14-a zauh turin hma a la a, AR chhuahsan ram chhunga thing 174 kih tur ruahman a ni.