MSSC golden jubilee lawm a ni; 'Kalphung ṭha zawk a awm theih nan theihtawp kan chhuah' - MSSC President

Mizoram State Sports Council (MSSC) chuan April 20, Thawhṭanni khan R Dengṭhuama Hall-ah an kum 50-na (golden jubilee) an lawm a; MSSC president Lalnghinglova Hmar, Sports & Youth Services minister chuan, infiamnaah kalphung ṭha zawk leh felfai zawk a awm theihna theihtawp chhuah a nih thu a sawi.

Lalnghinglova Hmar chuan, Mizo zingah infiammi ṭha tak tak an awm tawh rualin, international leh national level-a hlawhtling erawh an la beitham hle tih a sawi a, "Ṭan kan lak nasat a ngai a, theihtawp chhuah kan tum a, tum mumal tak nen hma lam pana ke pên kan tum. Kalphung ṭha zawk leh felfai zawk a awm theih nan theihtawp kan chhuah," a ti.

Infiamnaa ṭhalaite hmasawnna turin thurâwn an dawn theih reng thu sawiin Sports Minister chuan, "Mizoram leilung fate zingah Olympian pahnih chauh kan la awm hi a tlawmthlak. India ramin kum 2036-ah Olympic thlen a tum a, chutah chuan Mizo ṭhalai ṭhahnem tak India aiawha an tel theihna turin hmathlir mumal tak nen hma kan la mek," a ti a; Olympic-a hlawhtlinna hmuh theihna tur nia an hriat infiamna chi riatah theihtawp chhuaha hma an lak thu a sawi.

MSSC President chuan, MSSC hruaitu hmasate thawhrimna avangin golden jubilee lawm a ni tih a sawi a, "Golden jubilee kan lawm rual hian kum 50 lo awm leh tur, centenary hmel kan hmuh hun atana kan hmathlirte hi kan ngai pawimawh dawn," a ti.

MSSC golden jubilee lawmna inkhawmah MSSC president hlui leh chief minister hlui Lal Thanhawla, MLA pathum - Robert Romawia Royte, Jeje Lalpekhlua leh Lt. Col. Clement Lalhmingthanga, MSSC president hlui Zodintluanga Ralte, Lalrinsanga leh Rualchhina leh mi pawimawh dangte an tel. MSSC hnuaia affiliated sports association hrang hrang aiawhte an tel bawk.

MSSC hruaitu hluite leh hruaitu ni mekte hnenah chawimawina hlan a ni a; national level chin chung lama Mizoram tana hlawhtlinna changte chawimawina, MSSC Award sem a ni.

April 20, 1976 khan executive order hmangin MSSC din a ni a, The Mizoram State Sports Council Act, 2002 hmangin inrelbawlna leh kalphung mumal zawka tihchangtlun a ni. MSSC hnuaiah sports association 34 an awm a, pawl 34-te hian golden jubilee pualin Mizoram pum huap intihsiakna pakhat ṭheuh an buatsaih vek tawh.

MSSC golden jubilee pual hian April 22, 2025 khan Golden Jubilee Torch Relay buatsaih a ni bawk.