KHAWTHLIR

ILP endik rêl

Kolasib additional DC B Malsawmtluangi hoin nimin khan DC conference hall-ah Kolasib district-a inner line permit (ILP) dan bawhchhiate chungchang ngaihtuah a ni a; May 2026 chhungin sub-divisional hrang hrang - Kolasib, Kawnpui, Vairengte leh Bairabi-ah te tlawmngai pawlte nen ṭanghoin ILP joint inspection neih ni se, an ti. ILP nei lote leh ILP thi (expire) tawhte dap chhuah a nih theih nan police-te'n chawlhkar khatah vawi khat tal routine inspection an neih ziah ṭhin thu tarlan a ni a; khauh zawka ILP kalpui dan tur leh dan bawhchhiate hrem dan turte sawiho a ni bawk.

Kuhva rah man

Khawzawl police-te chuan nimin zing dar 3 vel khan Lianvala (20) s/o Lianneihkhupa, Champhai Vengthar khalh Ashok Leyland truck MZ-01 AD-1496 aṭangin Rabung dáiah Myanmar aṭanga lak luh kuhva rah ip 100 an man. Nimin zing dar 5 vel khan Khualen khuaah Lalchhandama (32), Champhai Zote khalh Bolero Camper aṭangin buhva rah ip 10 (kg 800) an man bawk. Kuhva rah leh a phurtute hi police-te chuan Custom Preventive Force, Champhai hnenah an hlan dawn a ni.

Tuitla ruang hmu

April 20, Thawhṭanni chawhma dar 11 vela South Chawngtui ram chhung Khawthlasang lía tla hlum Samuel Lalrinchhana (17) s/o VL Ṭhavela, Lungmawi ruang chu April 20 tlai lam khan hmuh a ni. Tuitla zawng hian Tarpho, Khawhri, Aithur leh Cherhlun aṭangin tuithiam eng emaw zat an thawk chhuak.

Lirthei zan riakah Parking fee la dawn

Nimina Lai Autonomous District Council (LADC) chief executive member C Lalsawmzuala hoa LADC CEM conference hall-a Village Level Parking Management Committee ṭhukhawm chuan, Lawngtlaia kawngpui dunga zan riaka lirthei dahte aṭangin parking fee lak an rel. Zan riaka kawng dunga lirthei dah man hi lirthei len zawng azirin bithliah a ni a; lirthei dah phal lohna hmuna dah an awm chuan parking fee let aia tam chawitir turin an rel a ni.