Lungleia bawlhhlawh sawngbawlna a taka hman theih thuai beisei

Lunglei Municipal Council (LMC) hnuaia Municipal Sanitation Committee (MSC) chu an chairman K Lalrinawma, LMC vice chairman kaihhruaiin nimin khan BoC meeting hall-ah an ṭhukhawm; Lunglei Solid Waste Management Centre (SWMC)-I chu hman theih thuai beisei a nih thu tarlan a ni.

Ṭhutkhawmah hian LMC chhunga fai intihsiak kalpui dan tur an rêl a; Lungleia bawlhhlawh khawn leh paih dan thlirho niin, hmalak dan turte an sawiho. LMC-a veng 18-in anmahnia bawlhhlawh khawn leh paih an buaipui laiin, LMC-in lirthei tira bawlhhlawh a khawnna veng paruk a la awm thu tarlan a ni.

Lunglei SWMC-I siam mek chu hman theiha peih thuai beisei a nih thu leh, khawl pawimawhte chah mek a nih thu leh bawlhhlawh chhêk khawm sate sawngbawl mek a nih thu tarlan a ni. SWMC I-ah hian bawlhhlawh ṭawih thei leh ṭawih thei lo thliar hran a, a hranga sawngbawl a ni ang.

K Lalrinawma chuan, Lunglei chu Swachh Survekshan 2024-2025 ah India rama fainaa hmabak nei êng berte zinga mi, 'Promising Swachh Shehar of Mizoram' atan thlan a nih thu a sawi a, "LMC leh mipui thawhhonain Lunglei khawpui chuan faina lamah hma a sawn zel ka beisei," a ti.