Cheng vbc 465 hû ruihhlo hâl ral

Champhai district bawrhsap Mohammad Aaquib chuan nimin khan District Hospital complex-ah police-te'n March-October 2025 chhunga ruihhlo an man cheng vbc 465 hû a hâl.

Nimina ruihhlo hâl tâkte hi Champhai police-te'n hmun hrang hranga an man, Champhai District Court-in hâl ral tura phalna a pek tawhte a ni a; heroin kg 35.852 (cheng vbc 71.70 hû), methamphetamine kg 490.896 (cheng vbc 392.71 hû) leh alprazolam kg 4.740 (cheng nuai 94.8 hû) a ni.

Champhai DC chuan, kum 2025 khan cheng vbc 117 hû ruihhlo hâl a nih thu sawiin, Champhai police-te hmalakna zara cheng vbc 465 hû hal a ni leh tur chu lawmawm a tih thu a sawi a, "Home Minister hmalaknaa Operation Jericho kalpui hian kawng tam takah awmzia a nei a, hun lo kal zelah ruihhlote titlem zel turin châwl loa thawh leh ṭhalaite'n ruihhlo an khawih loh nan nasa zawka inzirti a ṭul," a ti.

Champhai ṭhalaite'n infiamna, zirna leh thil dang dangah theihna sang tak an neih thu sawiin Bawrhsap chuan, "Ṭhalaite'n an theihnate an hloh mai loh nan theihtawp chhuaha ruihhlo laka ven a ṭul. Ruihhlo tawlh rûknaa inhmahnawihte man kawngah kan ṭanho zel a ngai a, khualzinte hriat ṭan mek Champhai hi a mawina hmu duha lo kalte'n a ṭha lo lam an hriat lohna turin ruihhlo doah theihtawp chhuah zel a pawimawh," a ti a; Champhai SP leh a thawhpuite thawhrimna fakawm a tih thu a sawi.

Ruihhlo hâlna inkhawm hi Champhai additional SP Victor Zothansanga'n kaihruaiin, ruihhlo man a nih dante a tarlang a; SP Lokeshwaran R pawhin thu a sawi a ni.