Kutziak hlui vawn ṭhat dan tur sawiho

Serchhip, Mamit, Saitual leh Hnahthialah nimin khan District Level Committee on Gyan Bharatam Mission an ṭhu a, district bawrhsap ṭheuhin an kaihruai. Ministry of Culture kaltlanga India ram pum huapa kutziak (manuscript) hluite zawn chhuah leh vawn ṭhat kawnga hmalak dan tur an rêl a ni.

Art & Culture depart-ment hnuaia Mizoram State Archives chemist C Lalmuanpuia chuan, Gyan Bharatam Mission in a tum ber chu pipute sûlhnu, an kutziak (khawlchhut ni lo)-te a rîral mai lohna tura vawn ṭhat a nih thu a sawi a, "Tunah hian zawn chhuah hna thawh mek a ni. Awlsam zawka hna thawhna turin Gyan Bharatam Mobile Application siam a ni a, mimal leh pawl, thu ziak hlui report tur neite chuan mobile application kaltlang hian an thehlut thei a ni," a ti.

Gyan Bharatam mobile application chu mipuiin an hmelhriat a pawimawh thu sawiin C Lalmuanpuia chuan, "Kutziak (manuscript) hluite hi a neitute remtihna thlapin uluk taka thla lak a, a thlalak (soft copy) chauh vawnhim tura lak tur a ni a, a tak (original) chu a neitute kutah a awm zui zel ang," a ti bawk.

C Lalmuanpuia sawi danin, Mizo-ram chuan Gyan Bharatam mobile application kaltlangin sorkar laipuiah report pahnih thehluh tawh niin, chungah chuan manuscript 28 report a ni a; hmarchhak state-ah Mizoramin manuscript report a nei tlem ber.

Gyan Bharatam Mission hi kum 2025 - 2031 chhunga kalpui tur a ni a; Art & Culture department chu state nodal department niin, April 1, 2026 khan state level committee leh district level committee din a ni.