KHAWTHLIR

Thisen pe

Mizo Higher Secondary School NSS unit chuan nimin khan Synod Hospital tan thisen unit 22 an pe a, petute mipa 17 leh hmeichhia panga an ni.

Digital bûkna endik

Siaha district civil supply officer M Vanlalduata leh Legal Metrology inspector LD Vabeihruasa te chuan April 21, Thawhlehni khan Chhuarlunga Supply kudam tlawhin an endik. Kudam aṭanga retailer hnena buhfai pek chhuakah bûkna (digital) hman a nih leh nih loh enfiahin, a nih dan tur ang takin bûkna hman a ni chu lawmawm an tih thu an sawi a ni.

DC-in tlawh

Kolasib district bawrhsap H Dolianbuaia chuan April 21, Thawhlehni khan Thingdawl Nursing School, Kawnpui Primary Health Centre, Kawnpui SDO (Civil) office leh Mualvuma 1st IR Battalion Headquarters te a tlawh. Bawrhsap hi hm,n a tlawha hotute leh thawktute nen an inkâwm a, mamawh leh harsatna an lo thlente chu a theih anga chinfel leh tihhlawhtlin a tum thu a hrilh.

Tomato chi sem

Krishi Vigyan Kendra (KVK), Khawzawl chuan nimin khan Tualtea kut hnathawktute pualin leilung sawngbawl dan inzirtirna an buatsaih a; Tualtea tomato chingtu chhungkaw 100 hnenah Indian Institute of Horticultural Research kaltlangin tomato chi an sem nghal. Zirhona thupui chu 'Leiṭha inbûk tâwk lo pekin leilunga nghawng ṭha lo a thlen theihte’ tih a ni a, KVK subject matter specialist (Soil Science) R Vanlalduati'n thil pawimawhte a zirtir a ni.

Ramri kawng siam tur sawiho

Saitual DC Srinivas Sadi hoin nimin khan District Border Coordination Committee-in Saitual district-a Indo-Myanmar ramri hungna leh luh/chhuahna (entry/exit point) panna tur kawng siam chungchang an rêl. Saitual district-a Indo-Myanmar ramri hungna leh entry/exit point panna tur kawng Hrianghmun khuaa siamna tur hmun chu endik a, endiknaah Border Roads Organisation, Assam Rifles, Hrianghmun VC leh YMA hruaitute telh an rêl a ni.