Kolasib Bawrhsapin ramri a tlawh

Kolasib bawrhsap H Dolianbuaia chuan nimin khan Vairengte leh a chhehvela Mizoram sorkar hmun pawimawhte leh Mizoram-Assam ramri a tlawh.

Bawrhsap hian national highway thlúr li tura laih mek chu Vairengte thlengin a en a, NHIDCL hotute'n ṭawiawmin, hnathawh mek dan kalphung leh hmasawn dan an hrilhfiah bakah, an mamawh leh hna chak zawka an thawh theih dan tur te an lo thlen a ni.

H Dolianbuaia chuan, ram leh mipui tana ro tling tur hmasawnna ruhrel thawk an nih angin mipui hmakhua ngaihtuah chunga theihtawp chhuah turin NHIDCL hotute a chah a; hna thawktute pawhin a hma thei ang bera hna zawh an tum thu leh theihtawp an chhuah thu an lo hrilh.

NH thlûr li tura zauhna daltu hrang hrang arbitration leh court case te a rang lama chinfel thuai a nih theih nan anmahni zawn ṭheuhah CALA, Kolasib leh NHIDCL te chu ngaihtuahna seng thar turin Bawrhsap chuan a chah bawk.

Kolasib DC hian ramri hnaiha 3rd Battalion MAP duty-na hmun te, Vairengtea 1st IR police duty te, Assam leh Mizoram inrinna bul Sabuala 5th IR police duty te a tlawh bawk a; ramria buaina leh harsatna an tawh ṭhinte sawiho a ni.

Kolasib Bawrhsap hian Vairengte Community Health Centre pawh a tlawh a, doctor leh nurse te nen an inkâwm.