MLA-in Tuichangral Games khârna hmanpui

MLA Jeje Lalpekhlua chuan nimin khan Khawhai khelmualah Tuichangral Games & Sports 2026 khârna a hmanpui a; hlawhtling turin talent neih ṭhat ringawt a tâwk lo a, thawkrim leh taima apiang an thleng sang ṭhin tih a sawi.

Jeje Lalpekhlua chuan, Tuichangral Games a awm theihna tura hma latute thawhrimna zahawm a tih thu a sawi a, "East Lungdar football ground-a grass phah a ni tur leh volleyball court siama a chung zâr a ni tur hian Tuichangral khuate sorkarin a ngaih pawimawhzia a lang. Tunlaiah sports hi eizawnna atan a hman tlak tawh a, amaherawhchu, mi zawng zawng eizawnna atan hman theih a ni lo. Hlawhtling tur chuan talent neih ṭhat ringawt a tâwk lo a, thawkrim leh taima apiang an thleng sang ṭhin," a ti.

Infiamnaa theihna nei an awm chuan eizawnna tlaka an hman theih nan mithiamte leh coach-te kaihhruaina hnuaiah theihtawp chhuahpui a ṭul thu sawiin Jeje Lalpekhlua chuan, "Sports hi damdawi mûm lian a ni a, eizawnna atana hmang lote tan pawh hriselna bakah, mi dangte nen inpawhna ṭha siamtu a ni," a ti a; thil hrang hrangah beidawn cháng awm ṭhin mah se, thawkrim zual sauh turin ṭhalaite a chah.

Tuichangral Games & Sports huam chhungah hian khua 33 a awm a; kumina Games-ah hian football mipa team 15 leh hmeichhia team pali, volleyball mipa team 11 leh hmeichhia team pariat bakah, kum 16 hnuai lam tan ritchawi (weightlifting), boxing leh inbuan (wrestling)-ah te inelna buatsaih a ni.