Governor-in Krismas leh kumthar hlim taka Hmang turin Mizo mipuite duhsakna a hlan

Thla hnih liamta maiah Mizoram Governor hna a chelh ṭan thu sawiin Larsap chuan, "He hun rei lote chhung hian Mizoram mipui duhsakna, ngaihsakna leh thlàwpna nasa takin kan dawng tih ka hmu a, thinlung takin lawmthu in chungah ka sawi a ni. Mizoram mipui hi in ngainatawm ka ti a, in rilru a zauin in zinga chên a nuam kan ti tak zet," a ti.

Governor chuan, Krismas chu hlimna, remna, lawmna, induhsak tawnna leh mi dangte tana luan chhuahna hun a nih thu sawiin, "He hunah hian Isua thuchah ropui tak, hmangaihna, lainatna leh inremna a ni tih kan thinlungah lo thar leh rawh se," a ti a; a naupan lai chuan martar Thoma Missionary School-ah lehkha a zir a, Krismas hlim taka a hman ve ṭhin thu a tarlang.

PS Sreedharan Pillai chuan, Isua chu Pathian fapa ni mah se, lal inah  piang loin tláwm takin ran thlêngah a pian thu sawiin, "Hei hian entirna pawimawh tak khawvel tan a buatsaih a ni. Isua pianna hian tlàwmna te, mi dang hmangaihna leh duhsakna te, Pathian tana rinawmnate min hriattirin min zirtir a ni," a ti.

Hunpui lo thleng turah Mizo mipuite chu mi dang, a bikin mi harsa zawkte ngaihsakna leh duhsakna kawngah an thinlung hawng tura ngenin Larsap chuan, Krismas chu ṭhenawm te, u leh nau te, mihringpuite leh ṭanpui ngaite chunga khawngaihna, duhsakna, lainatna leh hmangaihna lantirna hun ni se a duh thu a sawi.

Governor chuan, India chu khawvela ram ropui tak a nih angin, a chhunga chengte chu sakhaw rinna chungchangah an inzah tawn em em tih sawiin, "Remchanna insiamsak tawnin, khawi hmunah pawh kan sakhaw thurinte inthlahrunna awm miah loin kan auchhuahpui thei a. Ngaihtuahna fing leh rawtna ṭha zawkte chu khawi hmun aṭanga lo kal pawh ni se inhawng takin kan dawngsawng ṭhin a ni," a ti.

Ram danpui thuhmahruaiah mipui dah pawimawh ber a nih thu sawiin PS Sreedharan Pillai chuan, "A awmzia chu, India rama chengte hi angkhat kan ni. Sakhuana vang emaw, ṭawng hran vang emaw, chenna hmun vang leh thil dang vangin thliar hran kan ni lo," a ti a; kumthar lo thleng tur chuan Mizoram leh India tan hlawhtlinna leh malsawmna tam tak her chhuahpui se a duh thu a sawi bawk.