CAA 2019 hnûk kira sût turin ZPM ṭhalaiin India President ngen

Zoram Peoples' Movement (ZPM) ṭhalai chuan nimin khan Citizenship Amendment Act, 2019 (CAA) kaltlangpui lo a, hnûkkîr tur leh sût tura India President ngenna Mizoram Governor-ah 

an thehlut.

ZPM ṭhalaite ngenna hi ZPM ṭhalai president Malsawmzuala hoin hruaitu ṭhenkhatte'n Governor PS Sreedharan Pillai pisaah an thehlut a, Governor aiawhin a secretary K Lalthawmmawia'n a lo dawng a ni. ZPM ṭhalai chuan, CAA chu India rama Kristian inzawmkhawm pawl lian ber National Council of Churches in India (NCCI) pawhin an duh loh thu an tarlang. President hnena ngenna an thehluha ZPM ṭhalaiin CAA 2019 hnuhkir an phût chhan an tarlante chu a hnuaia mite hi a ni.

1.    Indian Constitution innghahna bulpui (basic principle) leh dan bung (provision) ṭhenkhat a kalh vang te, sakhuana behchhana khua leh tui nihna neih theih a nih dawn tâk vang te, Indian secularism (sakhaw zalenna leh tih bik neih lohna) a kalh tlat avangin.

2.    CAA-in a huam loh hmarchhak state ṭhenkhat an awm a, hei hian chiang taka a kawh chu - Central BJP Ministry-in hmarchhak state-te ṭhen hran a, rorelna kenkawh (devide and rule) a tum a ni.

3.    CAA-in Mizoram a huam ve lo nachungin, Bangladesh leh Tripura aṭanga dan loa Chakma lo lut rûte min vensak dawn lo tih a lan chian hle bawk avangin.