KHAWTHLIR

Taxation minister Lalchamliana chu nimina NDMC Convention Center, New Delhi a Union  Finance minister Nirmala Sitharaman hoa GST Council ṭhutkhawm vawi 38-naah a tel. Meeting hian a vawi khatna atana vote la in lottery-ah GST rate inang tlang (uniform rate) hman an rem ti. Lottery-ah hian 28% GST lak remtih niin March 1, 2020 aṭanga hman ṭan tur a ni ang.

Aizawla Luangmual Branch KṬP chuan nimin khan an kohhran hall-ah blood donation camp an huaihawt a, an member mipa 20 leh hmeichhia palite'n Synod Hospital tan thisen unit 24 an pe. Serchhip Chhimveng Branch YMA pawhin nimin khan Krismas pualin Serchhip District Hospital tan thisen unit 15 an pe a, a petute mipa 11 leh hmeichhia pali an ni.

Health minister Dr R Lalthangliana chuan USA-a thil pawimawh hrang hrang ti turin December 18, Nilaini khan India ram a chhuahsan a; a chàm chhungin United Nations for AIDS (UNAIDS), JHPIEGO leh World Bank headquarters-te a tlawh ang a, Mizoram thil pawimawhte a sawipui ang.

Health and Family Welfare Board vice chairman Dr ZR Thiamsanga, Mizoram State Health Care Society-a co-chairman ni bawk hoin a pisaah MSHCS hotute leh Synod Hospital thuneitute chu December 18, Nilaini khan an inkâwm. He hun­ah hian, Synod Hospital-in health care scheme an zawm ve theih dan tur leh thawhhona ṭha zawk a awm theih dan tur an sawiho a; hun remchang hmasa berah inkawm leh an tum a ni.

Prof. Laltluangliana Khiangte-in lemchan a ziahte dahkhawmna 'Hmangaih Lungdi (Lemchan Khawvel -3)' tih lehkhabu a siam chu nimin khan Synod Conference Centre-ah Mizoram Youth Commission chairman Dr Vanlalṭanpuia, MLA-in a tlangzarh. Lehkhabuah hian lemchan pathum - Lalziki leh Vangthanga, Zawlpala leh Tualvungi, Ralhneha leh Darmawii te a awm a ni.

Mamit District Police- chuan nimin khan Mamit khawpuia YMA branch hrang hrang parukte'n ṭanpui ngai nia an hriat chhungkaw pakua hnenah Krismas thilpek an sem. Police-in thilpek an semte chu Rs. 25,200 leh thawmhnaw ṭhahnem tak a ni. Serchhip SP pisa-a thawkte pawhin nimin khan Serchhip, Chhiah­tlang leh Keiṭum khuaa chhungkaw pakhat ṭheuh hnenah Krismas thilpek an hlan bawk.

Siaha DC Bhupesh Chau­dhary chuan Ningani khan BPCL CSR fund aṭanga a dil chhuah bawlhhlawh paihna tur lirthei thar pahnih chu DC conference hall kawt aṭangin a vailiam a, MADC hnuaia LAD department hnenah a hlan nghal. Lirtheite hian cheng nuai 19 man biodigester a chhawm tel a ni.