CAA ṭhiah loh chhan tur sawifiah turin Court-in sorkar laipui a hriattir - MZP

MZP chuan, Citizen­ship Amendment Act, 2019 (CAA) duh lohna kal zelah India hmar­chhak state hrang hranga zirlai pawl intélkhawm North East Students Organization (NESO)-in Supreme Court-ah petition an thehluh thu leh sorkar laipui chu insawifiah tura hriattir a nih thu an tarlang.

MZP thuchhuah tar­lan danin, CAA 2019 laka petition thehluh a nih angin December 18, 2019 khan Supreme Court-ah ngaihtuah (hearing) a ni a, NESO President leh hruaitu dangte pawh an inlan. Supreme Court chuan CAA 2019 chu 'stay' a nih loh chhan tur leh ṭhiah a nih loh chhan insawifiah turin sorkar laipui a hriattir a ni. January 22, 2020-ah hearing neih leh a ni ang.

Citizenship Amend­ment Bill, 2019 pass tawh chu Rajya Sabha-ah a tlang lohna tura ṭan khawhtu Ronald Sapa Tlau chungah an lawm thu sawiin MZP chuan, "CAB dodala hma a laknaah hnam hmangaihna thûk tak neiah kan ngai. Pu Ronald Sapa hi naktuk (December 20) hian a lo haw dawn a, Lengpui Airport-ah lo hmuakin, Tawlhlohpuan kan lo hlan dawn a ni," an ti a; Rajya Sabha MP an hmuahnaah a duh apiang kal turin an sáwm.

MZP chuan, "Kum 2016 aṭanga MZP-in a dodal tawh CAB/CAA hi Kristiante leh Mizote tana dan him lo tak a nih avang leh Hindu sakhua behchhana dan siam tumna hi hman a nih loh nan thâ thlah loa ṭawiawm zel tur leh Pathian au turin Mizo mipui kan sáwm a ni," an ti.