2019 Thla 11 chhungin Mi 12,307-in museum tlawh

Mizoram State Museum chuan January 1 - November 30, 2019 chhungin tlawhtu mi 12,307 a nei a, heng aṭang hian entry fee Rs 39,380 hmuh a ni.

State Museum-ah hian entur/ object 800 chuang awmin heng object te hi mi ṭhahnemngai te pek leh museum thu­neituten an lei khawm te a ni. January 2019-ah Museum Week hman niin a thlawna tlawh theih a ni a, week chhung hian mi 9963 in an tlawh. Week in a huam loh lai, en/tlawh man lak a nih lai hian January-ah mi 81 in an tlawha, heihi January - November chhunga tlawhtu a neih tlem ber thla niin July-ah tlawhtu an tam bera, mi 349 in an tlawh. He mi chhung hian Museum hi foreigner 12 in an tlawh ve bawk.

Museum tlawhtute hnen aṭanga entry fee hi puitling tan Rs. 20, naupang tan Rs. 10, sikul naupang uniform ha tan 50% concession leh foreigner tan Rs. 50 a ni. January - November thla chhung hian museum hian tlawhtu puitling 1284 leh naupang 1060 neiin heng aṭang hian entry fee Rs. 39,380 a hmu a ni. Museum hotute chuan museum chhungah mei­zuk leh thil ei an phal loh thu sawiin,"lo ti an awm a nih pawhin phal loh a nih thu ṭha takin kan in hrilh ṭhin. CCTV te kan nei a, thilbo leh rukrukna thleng a awm kan hre lem lo," an ti, museum a thlalak hlui tar chhuah te chu counter-ah mipui lei theih tura a thlalak copy an zawrh thu an sawi.