HSLC result hian zirlaite tan govt school a belh tlak tih a tarlang - Education Minister

Education minister Dr Vanlalthlana chuan Mizoram Board of School Education-in HSLC Examination 2026 result tihchhuah takah pass percentage 80 a kai chu lawmawm a tih thu leh, sorkar sikulte result-in nasa taka hma a sawn chuan zirlaite tan sorkar sikulte belh tlak a ni tih a tihlan thu a sawi.

Education Minister hian nimin khan HSLC 2026 result chhuak chungchangah thuchah a sawi a, "Zirlai exam hmachhawn mi 18,257 aṭanga za zela 80.31 laiin hlawhtlinna an chang thei leh nikum aia pass percentage sang, zaa 80 a kai thei hi a lawmawm hle a ni," a ti a; ruahman lâwk anga tihchhuah a ni chu lawmawm a tih thu a tarlang.

Kumina HSLC result chhuak-ah sorkar sikulah hmasawnna lawmawm a lang tih sawiin Dr Vanlalthlana chuan, "Nikuma sorkar sikula pass zaa 68.01 chu kumin hian khûmin, zaa 72.07 an pass. Candidate zawng zawng an fail vekna sikulah RMSA school la nei nual mah ila, govt school tih hming pu an lang tawh lo leh, zaa za pass vekna sikulah kum dang aia govt school an lang tam a, govt school 21 lai an lang hi a lawmawm. Kan result hian zirlaite tan govt school a belh tlak tih a rawn tarlang a ni," a ti.

Dr Vanlalthlana chuan, a lo puanzar tawh angin HSLC result puan dan chu kum dang aia a danglam thu sawiin, "MBSE website-ah zirlaite'n an mark leh percentage an en zung zung thei a, hei hi board dang pawhin an kalpui dan a ni," a ti a; kalphung tihdanglam chuan a ṭha zawnga nghawng a neih chhoh a beisei thu a sawi.

Education Minister hian zirlai hlawhtling zawng zawng a lawmpui thu sawiin, an hma hunah hlawhtlinna an chan zel theih nan duhsakna a hlan a; hlawhtlin zo ta lote chu beidawng mai lo a, nasa zawka ṭan la tur leh result lawmawm neih ngei tum turin a fuih.

HSLC result a hun taka chhuah a nih theihna tura buaipuitu MBSE-a thawk te, zirtirtu te bakah, zirlai nu leh pa te, khawtlang leh zirna kaihhnawiha theihtawp chhuahtute Minister chuan a lawm thu a sawi bawk.