Book of the Year 2025 lawmman hlanna nei

Mizo Thu leh Hla Inpui (Mizo Academy of Letters) chuan nimin khan IPR Auditorium, Aizawlah an pawl din champha an lawm a; Book of the Year 2025 atana an thlan 'Kham leh Suar' ziaktu Lalrammawia Ngente hnenah lawmman an hlan.

MAL din champha lawmna hi an president Prof. RL Thanmawia'n a kaihruai a, general secretary Dr Zoramdinthara'n pawl dinhmun leh hmalakna tlangpui a sawi. Khuallian Carol VLMS Dawngkimi, Art & Culture director-in kum 2025 chhunga Mizo ṭawnga lehkhabu chhuak ṭha ber, Book of the Year 2025 atana an thlan 'Kham leh Suar' ziaktu Lalrammawia Ngente hnenah lawmman Rs 10,000 leh thuchei a hlan a ni.

Carol VLMS Dawngkimi chuan, MAL chu pawl zahawm tak a nih thu sawiin, Art & Culture department nen an thawhhona a ṭhat thu a sawi a, "Thu leh hla hi mihring nun min siam ṭhatu leh nun kawng dika min hruaitu a ni a, khawvel leh India ram sûkthlêk thlirin, kan hnam nunphung, history bakah thawnthu phuah thar lam pawh kan uar deuh deuh a ṭul," a ti.

Art & Culture Director hian Dr Dar-chuailova Renthlei, Dr H Laldinmawia leh Lalrinngheta te lehkhabu thar a tlangzarh nghal a; chawhnuah MAL vice president Prof. Rualkhuma Colney kaihhruaiin Dr Lalthlamuana Ralte buatsaih ‘Tunlai thiamnain Mizo thu leh hlaa hnuhma a neih dan’ tih zirho a ni.

MAL General Secre-tary sawi danin, kum 2025 khan Mizo ṭawng lehkhabu 223 a chhuak a, chung aṭang chuan tehfung hrang hrang hmangin lehkhabu ṭha ber an thlang a ni. Kum 1989 aṭangin Book of the Year an thlang a, ṭum 37 an thlang tawh.

Book of the Year 2025 chawimawina thucheiah, “He lehkhabu hian mihring nun chhungril khawharna leh hmun hlauhawm tak tak a hai lang a, khawtlang nun inthlak meka sual ngaihzamnain nun a tihchhiat dan te, Pathian hmangaihna leh beiseina nungin sual thûk taka tlu tawh pawh a tuam dam theihzia te thiam takin a tarlang a ni. Chuvangin, Thu leh Hla Inpui (Mizo Academy of Letters) chuan kum 2025 chhunga Mizo ṭawnga chhuak lehkhabu zinga ṭha ber Book of the Year 2025 atan a thlang a ni,’ tia ziah a ni.