Kum dang aiin pass percentage a sang - MBSE Chairman

Mizoram Board of School Education chairman JH Zoremthanga chuan, HSLC Examination 2026-a zirlai hlawhtlingte a lawmpui thu sawiin, hlawhtling zo ta lote chu beidawng lo turin a chah a; result tihchhuah danah tih dan thlak ni mah se, pass percentage a chhiat phah loh thu leh kum dang aia a san zawk thu a sawi.

JH Zoremthanga chuan, result bua merit list (top 10 & division) tarlan ṭhin chu kumin aṭangin tihtawp a nih thu a sawi a, "Hei hi sikul leh zirlaiteah inelna dik leh ṭha zawk awm se duhna vanga sorkar hmalakna a ni a, board exam-a tih ṭhat tuma intlansiakna hian zirlaite tan an zir chhunzawm zelna turah harsatna a thlen zawk niin a lang. Exam-naa chhuak tur ngawr ngawr chauh zir lo a, zirlaibua an zir tur pawimawhte kim taka an zir hi an hma lam hun a tan a ṭhat zawk avangin hetiang hian hmalak a ni," a ti.

Zirlaite mark hmuh zat chu an certificate-ah tarlan vek a nih thu sawiin Zoremthanga chuan, "Hei hi CBSE, CISCE leh board lian deuhte kalphung a ni a, National Education Policy 2020-in kaihhruaina a siam - credit system leh grading system kalpui tura hma lo lâk lâwkna a ni," a ti a; sikulte leh zirlaite an ṭan loh hlauhna chungchangah kumin hian nikum aiin pass percentage a san zawk thu a sawi.

MBSE Chairman chuan, kumin hian zirlai exam zawng zawng an hlawhtlin vekna sikul 146 leh zirlai hlawhchham vekna sikul 113 a awm thu a sawi a; zirlai zawng zawng hlawhchham vekna sikul zingah sorkar sikul a tel lo chu hmasawnna ropui tak a nih thu a sawi bawk.

MBSE CHAIRMAN SAWI DANGTE

☑ Mark hmu sang berin 480 a hmu a, kum 2025-a pakhatna (mark 479) chu mark 1-in a khûm.

☑ Compartmental chance nei zirlai 117-te'n admission an tlai loh nan compartment exam buatsaih thuai kan tum.

☑ Result complaint hun ni sarih chhung hawn a ni dawn a, improvement exam pawh kuminah vêk buatsaih a ni ang.

☑ Exam centre 132-ah sikul 714 aṭangin zirlai 18,257 an exam.

☑ Social Science-ah zirlai fail 3,258 awmin, fail tam berna subject a ni.

☑ Mizo/language subject-ah zirlai 469 an fail a, zirlai fail tlem berna a ni.

☑ Mathematics-ah full mark (100) hmu zirlai panga an awm.