Larsapin Apex Bank hotute a kâwm

Governor Gen. Dr Vijay Kumar Singh chuan nimin khan Lok Bhavan-ah Mizoram Cooperative Apex Bank (MCAB) Ltd hotute a kâwm a; cooperative bank-te chu mipui náwlpui tana dàwr theih an nih avangin, tun aia hmasawn lehzual tura theihtawp chhuah turin a chah.

Apex Bank-in scheduled bank dinhmun a thleng thei chu a lawmpui thu sawiin Larsap chuan, "Scheduled bank in nih tawh avangin state sorkar hnuaia department-te pawhin dan ang takin an dâwr thei tawh dawn che u a ni," a ti.

Mizoram Cooperative Apex Bank chu tun hnai khan scheduled bank nihna pek a ni a; Gazette of India, April 15, 2026-a tarlan a nih danin, Apex Bank hi Second Schedule of Reserve Bank of India Act, 1934 ah telh a ni tawh ang.

MCAB hi July 31, 1982 khan din a ni a, Mizoramah branch 35 leh ATM booth 45 an nei mek. Sum kum 2025-26 chhungin deposit cheng vbc 1,930 hmuin, loan cheng vbc 1,272 an pe chhuak a, sum dah luh leh loan pek chhuah khaikhinna credit deposit (CD) ratio chu 66% a ni.