No Vehicle Zone-a inzawrh phal ṭha ti lo
Mizoram Merchant Association (MIMA) chuan thuchhuah siamin, Mizoram sorkarin No Vehicle Zone an siam leh tur chu ṭha an ti a, No Vehicle Zone huam chhunga inzawrh phal erawh ṭha an tih loh thu an tarlang.
MIMA chuan, No Vehicle Zone chu Krismas vuakvêtah mipuite zalen, hlim leh him taka an kal vel a, an bazar theih nana siam a nih thu tarlangin, "Chutih laiin, Traffic Coordination Committee-in No Vehicle Zone a siam leh turah hian No Vehicle Zone huam chhungah inzawrh a phal dawn niin kan hria a, hei hi MIMA chuan ṭha a ti lo a, a ngaithiam lo hle," an ti.
MIMA tarlan danin, kum 2009 khan sorkarin No Vehicle Zone a siam ṭan a, a huam chhungah mipui pawh kal hleih theih lohin an inzuar khat tlat a ni. Inzuar tam ber chu foreigner (Myanmar lam mi) an ni a, anni bakah sumdawn phalna nei lo an inzuar nasa hle bawk. Chhiah pe ve lote zalen taka an inzuar thei chu sorkar tan pawh chànna nasa tak a tling.
Kum 2010-ah sorkarin No Vehicle Zone tih leh a tum a, MIMA-in bandh neiha dodal an rêl thung. Mahse, sorkar nen a huam chhunga inzawrh phal loh tiin inremna an siam a ni. MIMA chuan, thuneitute chu No Vehicle Zone huam chhunga inzawrh phal lo tura ngenin, "MIMA ngenna hi a hlawhtling lo a nih chuan, sumdawngte'n GST thla khat chhung pek rih loh ni se, kan pek loh chhan central sorkar hriattir a, min ngaihhnathiam tura ngen ni se tih a ni," an ti a; Dawrpui area chhungah chuan, Dawrpui Local Council kaihhruai, Dawrpui Joint Committee leh MIMA-te foreigner leh illegal trader an inzawrh lohna turin an duty dawn thu an tarlang.