KHAWTHLIR

Larsapin kâwm

Larsap Gen. VK Singh chuan nimin khan Lok Bhavan-ah Shalom Special School, Serchhip zirlaite a kâwm. Larsap chuan, zirlaite hmangaih taka enkawl ṭhintu zirtirtu leh nu leh pate chhuanawm a tih thu sawiin, zirlaite tour an neihpui chuan Shalom Special School leh zirlaiteah hmasawnna a thlen ngei a beisei thu a sawi. Shalom Special School zirlaite hian Serchhip Battalion, Assam Rifles buatsaihin April 13-23, 2026 chhungin Aizawl, Silchar, Shillong leh Cherrapunji te tlawhin study tour an nei a ni.

Laboratory zirhona

Zoram Medical College & Hospital chuan April 22, Nilaini khan medical laboratory professional-te tan NABL Accredited workshop (Gunvatta Yatra Initiative) an buatsaih. He hun hi Quality Council of India hnuaia National Board for Quality Promotion hotute'n an hmanpui a; ZMCH-a Biochemistry, Microbiology leh Pathology department-a mi te, Aizawl Civil Hospital, RIPANS, Greenwood Hospital, City Hospital leh private laboratory ṭhenkhat aṭangin doctor leh laboratory technician-te an tel.

MPYCC-te'n duhsakna hlan

Congress ṭhalaite chuan thuchhuah siamin, ZPM president Lalliansawta leh vice president W Chhuanawma, MLA ten damlohna vanga party-a an nihna an chawlhsan a ngai chu pawi an tih thu an tarlang a, "Pathian zarah damna changa ram tana rawngbawl leh thuai thei turin duhsakna kan hlan a ni," an ti.

MLA-in hlan

Ṭawi bialtu MLA Prof. Lalnilawma, minister of state chuan nimin khan Saitual Cement Mistiri Association hnenah mistiri bungraw hrang hrang a hlan. SCMA-ah hian member 70 vel an awm a, an bungraw dawnte hi member a mamawh apiang tana hman tura tih a ni.

Kawng khâr ṭhin

Traffic SP C Vanlalvena chuan hriattirna chhuahin, Vaivakawna Salvation Army biak-in aṭanga Vaivakawn traffic point inkar kawngah pipe phûm a nih dawn avangin nimin aṭanga hna thawh zawh hma chu zan dar 9 aṭanga zing dar 5 inkarah kawng khâr ṭhin a nih dawn thu a tarlang.