Larsapin Youth Festival a hmanpui

ICFAI University Mizoram leh Tourism department chuan April 22-23, 2026 chhungin ICFAI University campus-ah Youth Festival (Univoyage) 2026 an hmang a; April 22, Nilaini khan Governor Gen. Vijay Kumar Singh-a'n a hmanpui.

Gen. VK Singh chuan, ṭhalaite tihphûrna tura thupui pawimawh tak tak zirna hun, Youth Festival buatsaih a ni chu ṭha a tih thu sawiin, "Zirlaite'n an hlawkpui ngei a ka beisei. Ṭhalaite hi kan ram nghahfak an ni a, kan ngaihven a ṭul," a ti.

Governor chuan, hna zawn nan leh siam nan thiamna inzirtirna leh peipunna a pawimawh avangin, chu lam hawi zirtirna ngaih pawimawh a ṭul thu a sawi a, mipui nawlpui kâwm tama ngaihven peih chu inzirna ṭha tak a nih thu a tarlang.

Khualzin hîp tam deuh deuh turin hmanraw tihchangtlun leh boruak duhawm zawk siam bak Mizoramin mamawh dang a neih loh thu sawiin Larsap chuan, "Sik leh sa nuam, hmun mawi leh boruak thianghlim nei a nihna hi tourism tihhmasawnna tura ṭha tak a ni," a ti.

Gen. VK Singh chuan, leilung leh a chhunga cheng nena inrem thlap khualzin hîp dan kalpui thiam a ṭul thu leh, Youth Festival chuan Mizoram leh a chhunga chengte tan rah duhawm tak a thlen ngei a beisei thu a sawi bawk.

Youth Festival 2026 hi ni hnih awh niin, thupui chu 'Exploring siversity, strengthening bonds' tih a ni. April 22-a thusawitu zingah Shillong Times editor Patrica Mukhim, Padma Shri leh Dr Theyiesinuo Keditsu te an tel a; nimina thusawitu zingah Tourism director Lalrodingi, MJA president Vanlalrema Vantawl leh tour operator Joe RZ Thanga te an tel.

Tlai leh zanah intihhlimna hun hman ṭhin a ni a; zaithiamte an zai bakah, thuam/incheina entirna hun te buatsaih a ni.