Mizoram Agricultural Policy duan thlirho

Agriculture & Farmers' Welfare minister PC Vanlalruata kaihhruaiin nimin khan Secretariat conference hall-ah sorkar hotute'n Mizoram Agricultural Policy duan (draft) an thlirho a; policy chu kut hnathawktute rîlrem thei ang bera duan an rêl.

Ṭhutkhawmah hian Green-Ag state technical director Dr Keny Vanlalhriatpuia'n Mizoram Agricultural Policy draft a sawi hawng a, Mizorama kut hnathawktute harsatna tawh hrang hrang sutkian dan tur leh hmalak zel dan turte sawiho a ni.

Khawl hmanga kut hnathawktute'n hlawk zawka thlai an thar theih dan tur te, ran chaw, bawnghnute leh ran vulha intodelh nana hmalak dan turte an sawi a, "Agricultural Policy hi kut hnathawktute rîlrem thei ang bera duan ni se," an ti.

Kut hnathawktute leh zirna-ina mithiamte thawhho a pawimawhzia te, ṭhalai leh naupang zinga kut hnathawh leh loneih/thlai chìn uar inzirtir a ṭulna dan te, loneitute'n an thlaite damdawi (fertilizer) tel loa enkawl a nihna organic certification awlsam zawka an neih theih dan turte sawiho a ni. Mizoram mipui tam zawk chu kut hnathawk leh lo neia eizawng an nih avangin Agriculture leh a kaihhnawih department hrang hrang thawhho a ṭul thu an sawi bawk.

Agriculture additional secretary Lalnunhlua chu Policy Drafting Com-mittee convener atan an ruat a; May 2026 tawp lamah Mizoram Agricultural Policy chu duan zawh turin an ruahman a ni.