Health Care Scheme chingfel vat turin MPYCC President-in sorkar a phût

Congress ṭhalai, Mizoram Pradesh Youth Congress Com­mittee (MPYCC) president Dr Lalmalsawma Nghaka chuan, Mizoram State Health Care Scheme (MSHCS) thar avangin mipuiin harsatna an tâwk nia sawiin, chingfel vat turin Mizoram sorkar a phût. 

Ningania Health Care Scheme zir chiang tura kal khawm Congress ṭhalaite hmaah thu sawiin Dr Lalmalsawma chuan, "MNF sorkar chuan health care scheme thar October 1, 2019 khan an tlangzarh. Sorkar hnathawk MR bill tu, MSHCS zawmtute leh PMJAY gold card hmangtute tan thil a buarchuar zo ta hi Congress ṭhalai chuan pawi kan ti hle a ni. Mipuiin rei an tawrh lohna turin a bilha tho lo he MSHCS thara mipui harsatna hi chingfel vat turin MNF sorkar kan phût a ni," a ti.

MPYCC President chuan MSHCS chhemi duang chhuakah MNF sorkar puhin, "Private hos­pital-te hi mi harsa leh rethei zawkte ban phâk a ni ta lo. Damlo mangangte buaipui hmasa loin, damdawi-inte thunun hmasak an tum a ni," a ti a; MSHCS kalpui dan leh Health department enkawl danah MNF sorkarin 'Lal Heroda' zia an chhuah niin an sawi.

Dr Lalmalsawma chuan, MSHCS zawmtu te, sorkar hna­thawk MR bill theite leh PMJAY gold card hmangtute hman theihna sorkar empanelment hospital hrang hranga rate hman lai tidanglamin rate thar sorkarin a bituk tih a sawi a, "Rate thar hi Non Government Hospital Association of Mizoram (NGHAM) chuan pawm harsa an tih thu leh damdawi-in tlâkchhiat theihna a nih dawn avangin an pawm theih loh tur thu thuchhuah an siam a ni. Synod Hospital pawhin SEC thurel angin, sorkar notification chu ṭha a tih loh thu leh an zawm rih loh tur thu an sawi a ni," a ti.

MSHCS zawm si lo, sorkar thupek zâwm anga sawi damdawi-in an awm tih sawiin MPYCC President chuan, "Sorkar hospital indaih lohna vanga Mizoram chhunga kohhran leh private hospital, mipuiin kan pan berah MR bill leh MSHCS hman theih a nih tâk si loh avangin damlo harsa zawkte leh an chhungte mangangin an buai hle a ni," a ti a; eng damdawi-inah pawh awm se, MSHCS thara inziak lut tawh zawng zawngte an damdawi-in awm man pe vat tura sorkar an phût thu a sawi.