MSU-in zirlai hlawhtlingte lawmpui

Mizo Students’ Union (MSU) Gen. Hqrs chuan thuchhuah siamin, High School Leaving Certificate (HSLC) result nimina tihchhuahah zirlai exam zinga 80.31% an hlawhtling chu lawmawm an tih thu an tarlang a; zirlai hlawhtlingte lawmpuiin, hlawhtling lote beidawng lo a, hlawhtlin ngei tum turin an ngen.

MSU chuan, HSLC 2026-ah sikul 146-in 100% pass percentage an nei thei chu lawmawm an tih thu leh sikul 13-in 100% fail percentage an nei chu pawi an tih thu an sawi a, "Heng zirlai zawng zawng failed-na sikulte hi ṭan la zual tur leh theihtawp chhuah thar a, an sikulin hlawhtlinna an chan ngei theihna tura thawktute leh zirlaite'n inpekna nasa lehzual nei thar turin kan ngen a ni," an ti.

MSU chuan, "Mi zawng zawng hmuh theiha ranking leh result bua division tarlan a ni ta lo hian hun lo awm turah rah ṭha zawk a chhuah ngei kan beisei a, mark hmuh sana inelna aia quality education, mihring puitling leh hman tlaka inchher chhuahna lam a hrin chhuah ngei kan beisei," an ti bawk.