KHAWTHLIR

HSSLC result

Mizoram Board of School Education (MBSE) chuan April 29, 2026 chhun dar 12 khian HSSLC Examinations, 2026 result a tichhuak dawn. Result hi MBSE Office, Chaltlang leh MBSE Regional Office, Lunglei bakah, www.mbse.edu.in leh www.mbseonline.com ahte hian en theih a ni ang. Office hun chhungin whatsapp/phone call hmangin 9366278842/9863722521 (Aizawl) leh 9863519718/ 9612226288 (Lunglei)-ah te zawhfiah theih a ni bawk ang.

Zu an man

Phaisen Police Check Gate-a duty-te chuan April 23, Ningani chhun dar 12 vel khan Ashok Leyland AS/01 RC - 8216 aṭangin sapzu (Iconic White Whisky) litre 198 leh beer (Kingfisher) litre 408, a printed price aṭanga chhuta cheng nuai 1.97 man hu an man. Zu leh beer kaihhnawihah hian Fokrul Islam Laskar (20) leh Ansar Uddin Laskar (19), Cachar district ve ve man niin, Vairengte PS-ah thubuai ziahluh a ni.

CYMA-in lawmpui

Central YMA chuan thuchhuah siamin, MBSE-in April 23, Ningania HSLC, 2026 result a tih chhuahah zirlai 14663 (80.31%)-in hlawhtlinna an chang lawmawm an tih thu sawiin, "Zirlai pass zawng zawngte kan lawmpui tak zet a ni. An zir leh zelna turah ram leh hnam rilru pu chunga chhunzawm zel turin duhsakna kan hlan. Tun tuma hlawhtling ve ta rih lote pawh hnual mai lovin theihtawp chhuah zel turin kan ngen a ni," an ti.

Health camp

Social Welfare department bultumin April 23, 2026 khan Bungtlang South Primary Health Centre-ah rualbanlo (PwD)-te tan health camp buatsaih a ni a; khaw 34 aṭangin mi 184 an inentir a, heng zinga rualbanlo 124 hnenah PwD certificate pek nghal a ni.

Harsatna awm lo

Lawngtlai District Level Monitoring Cell Committee chuan nimin khan district bawrhsap Donny Lalruatsanga kaihhruaiin Lawngtlai district-a eirawngbawlna gas leh tuialhthei dinhmun thlirhoin, harsatna awm loh thu tarlan a ni. Eirawngbawlna gas bika DAC lama harsatna awm chungchangah thuneitute hnenah lehkha leh ṭawngkaa thlen a nih tur thu an sawi.