Ram hmasawnna tura pawimawh ber chu khawtlang tih hmasawn a ni - Prof. Nitea

Directorate of Local Administration department (LAD) chuan nimin khan DRDO Aizawl conference hall-ah 'National Panchayati Raj Day' pualin hun an hmang a; Rural Development & Administration minister Prof. Lalnilawma'n hmanpuiin, ram hmasawnna tura pawimawh ber chu khawtlang tih hmasawn a nih thu a sawi.

Prof. Lalnilawma chuan, ram tih hmasawnna tura pawimawh ber chu khawtlang tih hmasawnna a nih thu a sawi a, "Chumi atana mawhphurhna pawimawh tak chu khawtlang inrelbawlna kaihruai tura thlan – village council member-te kutah a awm. Kum 2047-a India ram hi ram hmasawn leh ropui 'Vikshit Bharat’-a siam a nih theih nan VC hi hmanraw ṭangkai tak an ni mek," a ti.

VC-te kaltlanga khawtlang tih hmasawnna hna thawh kawngah inelna thianghlim neih ṭhin a pawimawh thu sawiin Minister chuan, "Khawtlang mipui aiawh tura thlantlin kan nih angin, a ṭul hunah chuan kan mimal ngaihdan leh awnlam neihte dah boin, khawtlang ṭhatna tur dah pawimawh hmasak ber ṭhin a ṭul," a ti a; a hun taka ṭanrual leh thawhhona boruak siam thiam khawtlang hruaitu awmna apiangah hmasawnna a kal chak ṭhin thu a sawi.

Prof. Lalnilawma chuan Village Council Act (VC Dan bu) thar tlangzarh a nih thu leh he dan buah hian VC-ten thu an neihna chi hrang 21 tarlan a nih thu a sawi a, "VC-te mawhphurhna pawimawh tak tak pawh ziahlan a ni. VC member-te lawmman ennawn a nih theih nan hmalakna a kal mek a, 15th Finance Commission hnuaia 2021-22 Grant la bang te, 2022-23, 2023-24 leh 2024-25 Grant-te hmuh tawh niin, 16th FC-ah chuan own source of Rrevenue, VC mahni inenkawl thei tura ruahmanna siam thiamte chu ngaih pawimawh an ni dawn," a ti bawk.

RDA director Dr Lalngura Tlau pawhin thu sawiin, Mizoram pumah VC 830 a awm thu leh heng zinga 286 hi autonomous district area huam chhunga mi an nih thu a sawi a; VC-te thuamchak nan VC tin hnenah computer sem chhuah mek a nih thu a sawi.

National Panchayati Raj Day thupui chu 'Sashakt Panchayat, Sarvangeen Vikas’ – Empowered Panchayats, Holistic Development' tih a ni a; RDA, IPR ,SRRD, DRDO, Aizawl, Mizoram Village Council Association hruaitute leh Village Council thlan chhuahte an tel. Minister hian National Panchayati Raj Day pual hian VC 12 hnenah computer a hlan nghal a ni.