Damdawi zuarte'n inkhawmpui an hmang; 'MR man an awmfo hi a ṭha lo hle' - CYMA President

Mizorama dawmdawi zuar intelkhawm Mizoram Chemists & Druggists Association (MCDA) chuan chuan nimin khan Dawrpui Multipurpose Centre-ah inkhawmpui an hmang a, an hun hmanpuitu Central YMA president R Lalngheta chuan, "Medical representative (MR) man an awmfo hi a ṭha lo hle," a ti.

R Lalngheta chuan company MR ṭhenkhat ruihhlo thehdarh kawnga phusa ṭhin leh man an awm fo chu ṭha an ti lo hle tih sawiin, "YMAin nataka hma alak hmain sim ngei se ka duh. Mizoramah ruihhloin kan ṭhalai mai bakah chhungkaw tam tak leh khawtlang a ti buai nasa a, thihna tam tak a thleng hi a pawi hle," a ti a, YMA chuan heihi ngai pawimawhin 'Ruihhlo Do' tih YMA kumpuanah an neih leh phah hial thu a sawi.

CYMA President chuan a bikin ruihhlo zingah heroin-in kan ṭhalaite a tibuai nasa tih sawiin, "Burma lam aṭanga a lo lut nasa takzet a, CYMA CADS leh sorkar ṭangkawpin nasa takin hma a la ni. Kan ram hi ruihhlo kalkawnga hmanga methamphatamine (crystal mMeth) tam tak tak an man ṭhinte hian kan ram hi ramdang lakah min ti hmingchhia a ni," a ti.

MCDA-te nen an thawhhona a ṭhat thu sawiin R Lalngeta chuan, "Kawng hrangin mite tana malsawmna in ni. CYMA-in Manipur leh Burma raltlan a buaipui laia rRaltlante mamawh damdawi man tam inthawh te, CYMA-te nena ṭangkawpa free clinic TBCC leh OKM a neih a damdawi cheng nuai tam tak in tawh ṭhinte leh sorkarin ruihhlo camp Hulhliap a siamah leh CYMA-in ruihhlo ngaite tana camping a buatsaih lai pawhin in thawh hlawk hle," a ti a, MCD-te chungah a lawmthu a sawi.

MCDA rorel inkhawmah damdawi zuar pangai tak tak mipui pawhin an chhawr ṭangkaite an awm laia duham fal leh ruihhlo tawlh nana an drug license hmang ṭhinte chu hrem ṭhin nise, an damdawi dawr supervise tu pharmacist-te pawh hrethiam fo bik loa hrem tel ṭhin nise, an ti.

Hetih lai hian damdawi zawrhna atan hman mobile drug license ṭha ti lo leh duh lo ber ber nisia Health department-in nasa taka an pek belh chu ṭha lo an ti. An tarlan danin, danah chuan mobile drug licence hi damdawi zuar awm lohna khua leh motor-in a tlawh pawh lohna khua atana pek ṭhin a ni a, tun dinhmunah chutiang khua chu a awm tawh mang lo chungin an pek belh zel a ni.