UPC-NEI inkhawmpui vawi 58-na ṭan a ni

United Pentecostal Church of North East India inkhawmpui lian ber, general conference vawi 58-na chu April 23, Ningani zan aṭang khan LPS Arena, Falkland, Aizawlah ṭan a ni a; inkhawmpui thupui atan 'Isua Krista lo kal lehna' (Thup. 22:12) hman a ni. Tun ṭum inkhawmpuiah hian general hruaitute thlan thar a ni dawn.

Inkhawmpui ṭan zan hi general superintendent Rev. Zohmingthanzama'n kaihruaiin, Rev. Ellic Hnehzova Fanai-in inkhawmpui hi hawngin Pathian hnenah a hlan a; general treasurer Rev R Laichhingpuia'n Pathian thuchah a sawi. Nimin khan chhun lamah rorel inkhawm neih niin, LPS Arena-ah General Missions Department, Zemabawk Vengpui Biak-Inah General Sunday School Department leh YRC Falkland-ah General LAD-ten ro an rel a ni.

Kumin hi UPC NEI general hruaitu thlan thar hun niin, tukin zing dar 7 khan Mualpui Biak-inah hruaitu thar thlanna hi neih a ni a; vawiin chawhma dar 10:30 aṭangin LPS Arena-ah hian General Kohhranpui Rorel inkawm neih chhunzawm a ni ang. Inkhawmpui hi naktuk zanah a ṭiak dawn a ni.