MMSA (Assistant Unit)-in inkhawmpui an hmang

Mizoram Ministerial Service Association (MMSA) Assistant Unit chuan nimin khan Vanapa Hall-ah general conference vawi 20-na an hmang.

Inkhawmpui hi MMSA (Assistant Unit) president Lalchangliana Colney-in a kaihruai a; secretary Remlalliana leh treasurer Vanlalruata ten hmalakna leh sum dinhmun an report a; vice president Samuel Lalrozama'n kaisangte leh pension-te thlahna leh lawmpuina thuchah a sawi. Inkhawmpuiah hian Mizoram sorkar hnuaia assistant 300 vel an kalkhawm a ni.

Tarlan danin, sorkar kum 2025-26 chhung khan MMSA (Assistant Unit) member 53 an pension a, Jr. Grade of MSS-ah mi 33 kaisangin, member thi pathum an awm. Assistant-te pay level 7 aṭanga level 8-a chho tura sorkar an ngenna leh assistant tih chu central lama an tlukpui (counterpart)-te nena inmil turin Assistant Section Officer tia thlak tura sorkar an nawrnate chu tun sorkar tharah hian beiseina sang tak nen an thlir mek a ni.