Minister-in PGIMER a tlawh

Nimin khan Health minister Lalrinpuii chuan Post Graduate Institute of Medical Education and Research (PGIMER), Chandigarh a tlawh a, Mizorama medical college - ZMCH-ah zirna quality a lo ṭhat chhoh zel theihna turin PGIMER nena teachers exchange programme leh students exchange programme neih theih dan tur kawngte a sawipui.

Health Minister hi PGIMER director Dr Vivek Lal chuan a lo dawngsawng a, ZMCH nena thawhho theih dan kawng awm thei ngei se a duh thu a lo hrilh a, "A rang thei ang bera thawhhona a awm theihna turin inremna thuthlungte pawh ziah ran nise," a ti.

PGIMER Director chuan MD course-ah sponsored seat an neih thu sawiin, Mizoram doctor-te zingah entrance exam paltlang thei awm tam se a duh thu Health Minister hi a hrilh.

Lalrinpuii chuan PGIMER Director hi ZMCH a hawn thar tur lung lam zaina - Cardio Thorasic chungchanga thawktuten practical training an neih chhoh zel dan tur kawng a sawipui nghal.