KHAWTHLIR

Bial inkhawmpui

Mizoram Synod hnuaia pastor bial hrang hrangte chuan April 24, 2026 zan aṭang khan bial inkhawmpui an hmang a, nizan khan a ṭiak. Inkhawmpuiah hian Inrinni khan niléngin rorel a ni a, bial chhung thilte bakah, ram pum huap kaihhnawih thilte rèl a ni. Kohhran inchhiarna hnuhnung ber ang chuan, Mizoram Synod hnuaiah hian member 6,46,891, dan zawhkim 4,77,766, chhungkua 1,45,142, tualchhung kohhran 1,185, pastor bial 310 leh presbytery 48 a awm.

Bawrhsapin khap

Lawngtlai bawrhsap Donny Lalruatsanga chuan tunlai hian Myanmar-ah bawng/lawi pul hri a leng mek nia thu dawn a nih avangin, Lawngtlai district chhunga an ran vulhte a lo him zawk theih nan, ramdang aṭanga bawng leh lLawi lakluh. Thupek hian thla hnih chhung a huam dawn a, thupek zawm lo chu Section 223 of Bharatiya Nyaya Sanhita (BNS) hmangin hrem theih an ni.

Bawrhsapin tlawh

Kolasib bawrhsap H Dolianbuaia chuan April 25, Inrinni khan Thingdawla sorkar hmun pawimawh hrang hrang a tlawh kual a, Jawahar Navodaya Vidyalaya (JNV),, Veterinary Farm, District Agriculture Centre leh Horticulture Centre of Excellence-te a tlawh a, an hmalakna leh hnathawh dan a enfiah. Bawrhsap chuan tualchhung mite hnena JNV pawimawhna thehdarh a pawimawh thu sawiin, "Zirlaite Hindi ṭawng thiam kawngah leh zirna bakah thiam thildang (co-curricular activities) ah te hma an sawn hi a lawmawm hle," a ti.

Certification camp

Social Welfare, Women & Child Development department leh Health & Family Welfare department ṭang kawp hmalaknain vohbikte (persons with disabilities) tan April ni 22–24, 2026 chhung khan Lunglei district chhunga Thenhlum, Lungsen–II leh Tlabungah Disability Certificate/UDID Assessment & Certification Camp an buatsaih. Camp-ah hian Bunghmun, Lungsen leh Tlabung RD Block chhunga khaw 39 aṭangin vohbik mi 303 te chu Disability Certificate/UDID pe chhuak tura endik an ni.