World Malaria Day hman a ni; Mizoram - sikserh hluar berna state

April 25 kha sikserh dona ni, World Malaria Day a ni a, Mizoramah pawh hmun hrang hrangah hman a ni. Mizoram chu India rama sikserh hluar berna a ni a; kumin 2026-ah January aṭanga March thla thlengin Mizoramah sikserh vei mi 666 hmuh chhuah ni mah se, thihpui an la awm lo.

World Malaria Day pual hian Inrinni khan Mizorama district tinah hun hman a ni a; khawtlang mipui leh pawl hrang hrang ten sikserh chungchanga inzirtirna hman a nih bakah, Source Reduction Drive (thosi pian theihna tui tling tihbo hnatlang) neih a ni.

Lo/huan neitute hnenah sikserh laka an him theih nan hmalakna chi hrang hrang neih niin, sikul zirlaite nen hun hman a ni a; sikserh tamna district-ah lirthei hrang hrangah sikserh dona thuziak (poster) târ a ni bawk.

National Vector Bourne Disease Control Programme (NVBDCP) tarlan danin, January-March 2026 chhungin Mizoramah sikserh vei mi 666 hmuh chhuah an ni a, sikserh vanga thi erawh an la awm lo. Kum 2024 khan sikserh vei mi 16,899 hmuh niin, mi pasarihin an thihpui a, kum 2025-ah sikserh vei mi 9,328 hmuh niin, mi paruk an thi.

NVBDCP chuan, Mizoramah sikserh a la hluar hle tih tarlangin, "Tun dinhmunah India ramah mi sang khat zel aṭanga sikserh vei hmuh chhuah zat (Annual Parasite Incidence) aṭanga chhûtin sikserh tamna ber state kan ni mek zel a, hei hian sikserh donaah ṭan lak kan ngaih nasatzia a lantir," an ti.

World Health Organisation (WHO) hnuaia World Health Assembly chuan kum 2007 khan sikserh chungchanga inzirtirna leh hriat tur ṭulte inzirtirna ni atan World Malaria Day hman a rêl a; kum 2008 aṭangin April 25-ah hman ṭhin a ni a, kumina thupui chu 'Driven to end malaria: Now we can, now we must' tih a ni.

NVBDCP tarlan danin, kum 2024 khan India ramah sikserh vei mi 2,55,500 hmuh chhuah niin, mi 86 an thi a; kum 2025 khan mi 2,33,555 hmuh chhuah niin, mi 55 an thi. Hmarchhak state-te bakah, Andhra Pradesh, Chhattisgarh, Gujarat, Karnataka, Madhya Pradesh, Maharashtra, Odisha, Tamil Nadu, Uttar Pradesh leh West Bengal te chu sikserh tam deuhna state a ni.