World Veterinary Day lawm a ni

April 25, Inrinni khan AH & Vety dept, Mizoram State Veterinary Council (MSVC) leh Indian Veterinary Association (IVA), Mizoram ṭangkawp buatsaihin Aijal Club-ah 'World Veterinary Day, 2026' lawm a ni a, AH & Vety secretary Lalsangliana'n a hmanpui.

AH&Vety Secretary chuan IVA member zawng zawngte World Veterinary Day pual chibai bukin duhsakna a hlan a, "Ei leh bar dehchhuah bakah a hrisel em tih ngaihven thlengin veterinarian-te an pawimawh. Ran hriselna piah lamah ram leh hnam hriselna chu an kutah thui tak a innghat," a ti.

Veterinary profession chu hna zahawm tak a nih thu sawiin Lalsangliana chuan, eizawn nana thlang tawhte chu hawi kir loa, tih takzeta thawka an thiamna leh tawnhriatte hmanga danglamna thlentu nih tum turin a chah a ni.

AH & Vety Secretary chuan Animal Husbandry & Dairying chu sorkar laipuiin a ngaih pawimawh thu sawiin, "An la ti lian deuh deuh dawn. Department hnuaia thawktute inpekna a fakawm. Sawrkar laipui atanga fakna awka dawn a ni hi a lawmawm hle," a ti.

World Veterinary Day 2026 pual hian Inrini chawhma khan Aizawla hmun pathum - State Veterinary Polyclinic Hospital, Khatla, Ṭhuampui leh Lawipuahte Free Health Clinic leh Free Anti-Rabies Vaccination Camp-te buatsaih a ni. Ran eng emaw zah a thlawna entir niin, ui a hri danna anti-rabies vaccine dose 196 pek a ni.

World Veterinary Day hi Mizoramah chuan kum 2012 aṭang khan kum tin April thla Inrinni hnuhnung berah hman ṭhin a ni. Ran hriselna venhim leh enkawl bakah, mipui vantlang hriselna venhim kawnga veterinary doctor-te pawimawhna leh intuaitharna hun atan an hmang ṭhin.

Kumin hian thupui atan 'Veterinarians: Guardians of Food and Health' tih an hmang.