Kuminah Khawzawl dist-ah ruihhlo Rs 11,75,40,000 hù man a ni tawh

Khawzawl district NCORD chu nimin khan district bawrhsap K Vanlalṭhiana kaihhruaiin an ṭhukhawm a; kumin hian Khawzawl district-ah Rs 11,75,40,000 hu ruihhlo man a nih tawh thu tarlan a ni.

Tarlan danin, kumin 2026-ah hian Khawzawl district-ah ruihhlo Rs 11,75,40,000 hû man a ni tawh a; chu'ngte chu - heroin gram 329 (Rs 65,80,000 hu) leh methamphetamine kg 13.87 (Rs 11,09,60,000 hu) a ni.

NDPS Act hnuaiah thubuai pasarih ziah luh niin, mi 10 man an ni a; Mizoram Liqour (Prohibition) Amendment Act, 2025 hnuaiah thubuai 11 ziah luh a ni bawk.

Khawzawl Bawrhsap chuan, ruihhlo do leh man kawngah Khawzawl Police leh Excise & Narcotics department te thawhrimna fakawm a tih thu a sawi a, "An ṭhahnemngaihna leh inpekna avangin lawmthu ka sawi. Mizoram district hrang hrang zingah Khawzawl chu kuhva rah tawlhruk man tam ber kan ni a, kuhva rah tawlhruk hian kut hnathawkte eizawnna a tihbuai avangin a do kawngah theihtawp chhuah zel a pawimawh," a ti.

Ṭhutkhawmah hian zûk leh hmuam donaa hmalaknate tarlan a ni a; May 2026 khian Khawzawl district-a ruihhlo awm lohna khua (drug-free village) atana thlan Tlangmawi khua chu ruihhlo lakah an fihlim ngei em tih endik an rel a ni.