KHAWTHLIR

Motor workshop sawn chhuah rel

Lawngtlai district bawrhsap Donny Lalruatsanga hoin nimin khan 'Standup Lawngtlai Programme' hnuaia Traffic Enforcement Task Force Commitee leh Clean Lawngtlai Committee an ṭhukhawm. Lawngtlai khawpui hmasawnna tur ruahmanna hrang hrang sawiho a ni a; khawpui chhunga motor workshop awmte'n khawpui a tihchêp avangin KMMTTP kawnga sawn tura hmalak an rel a ni.

Ṭanpuina hlan

Kolasib district bawrhsap H Dolianbuaia chuan nimin khan a pisaah Kolasib district-a ruihhlo ngaite enkawlna leh fahrah naupangte enkawlna - TNT Kolasib, Audrene Scism, The Salvation Army Enna In leh Omega Centre hnenah Mizoram Governor's Discretionary Grant aṭangin ṭanpuina Rs 25,000 ṭheuh a hlan.

Oil leh gas sawiho

Siaha District Level Monitoring Cell chu an chairman VL Hruaizela Khiangte, district bawrhsap kaihhruaiin nimin khan an ṭhukhawm. Bawrhsap chuan, Siaha district tana eirawngbawlna gas leh tuialhthei kalte chu mipui tana thawktu an nih angin hmun danga pawhpên leh chheprelh emaw, man to zawka hralh duhna emaw avanga dan kalha thiltih a awm loh nan lungrual taka thawhho turin kal khawmte a chah.

Free medical camp

Assam Rifles chuan nimin khan Farkawn khuaah Free Medical Camp an huaihawt a, tualchhung mi 350 vel an inentir. Inentirte chu AR doctor-te'n an hriselna dinhmun an enfiah a, an mamawh ang damdawite a tlawnin an pe bawk.

Sawhthing leia thawhho dan tur rêl

Serchhip district bawrhsap Paul L Khuma hoin nimin khan District Agriculture Marketing Committee leh Ropuiliani Women Farmers' Producer Company (RWFPC) ten sawhthing lei leh hralh chungchanga thawhho dan tur an rel. RWFPC hian East Lungdar, Mualcheng, Lungpho, Chhingchhip leh Serchhipah te sawhthing lei ṭan turin an rel a; sawhthing an leina record felfai tak siamin, secondary collection centre-a supervisor-te hnenah an thehlut ṭhin dawn a ni.