Zuangtui-IV Polling Station-a vote tlate vawiinah chhiar dawn

Aizawl Municipal Corporation inthlanpui vote tlate nimina chhiarah Ward I-a Zuangtui-IV Polling Station-a vote tlate chhiar theih a ni lo a, vawiin hian chhiar a ni dawn.

State election commission Dr H Lalthlangliana'n hriattirna a tihchhuah danin, Zuangtui PS IV-a vote thlakna atana hman electronic voting machine (EVM Control Unit Serial Number Z07457) chu nimina chhiar a nih dawnah result button an hmehin candidate-te vote hmuh zat lang tur chu a lang thei lo. EVM siamtu BEL engineer Laxman Khot chuan result button a chhia a, mahse, vote tla erawh a bo loh thu a sawi.

Ward-I chhunga PS dang zawnga vote tlate chhiar zawh a nih hnua vote hmu sang ber leh a dawttu inthlauhna chu vote 1,586 a ni a, Zuangtui-IV PS-a vote tla zat chu 644 a ni thung a; vote la chhiar loh hian result a tihdanglam phak tawh loh avangin nimin khan returning officer-in Ward I result a puang tlang ta a ni.

Zuangtui-IV PS-a vote tlate chu vawiin hian SEC ruahman angin Aizawl DC Office-ah chhiar a ni dawn a; dan angin Control Unit Sl.No. Z07457 chu strong room aṭangin Observer leh political party aiawhte hriatpuiin lak chhuah a, SEC pisaah chhun dar 12-ah chhiar tum a ni.

Vote chhiarnaah hian AMC inthlana general observer Lalnun-hlua, Ward-I atana Municipal Returning Officer/Asst. Municipal Returning Officer, Ward I-a candi-date-te emaw, an election agent-te emaw, political party aiawh pahnih ṭheuh bakah, MJA office bearer-te tel tura beisei an ni.