Chintan Shivir-ah minister Lalrinpuii a tel

Social Welfare minister Lalrinpuii chu April 24-26, 2026 chhunga Ministry of Social Justice & Empowerment-in The Lalit Hotel, Chandigarh-a a buatsaih Review meeting - Chintan Shivir-ah a tel.

Lalrinpuii chuan, ṭhutkhawma sawiho hrang hranga pawimawh tarlante chu uluk taka lo ngaihtuah tur leh, India ram chu hnam ze hrang hrang awmna, ṭawng leh sakhaw hrang hrang nei, sik leh sa thleng pawha inang lo tak takte chèn khawmna a nih avangin an danglamnate hre reng chunga scheme leh project kalpui dan tur duang ṭhin turin a ngen a, "Mipuite'n an ta neih tak tak theih scheme leh project siam a pawimawh," a ti.

Mizoram chu ram inlungrual leh ṭangrual an nih thu sawiin Lalrinpuii chuan, sorkar leh tlawmngai pawlte ṭha taka an thawhho ṭhin thu leh hei hian ram mipui tana hmalaknaah hlawhtlinna a thlen ṭhin thu a sawi.

Review meeting - Chintan Shivir-ah hian Ministry of Social Justice & Empowerment hnuaia hmalaknate thlirho a nih bakah, hmachhawp hrang hrangte chak zawk leh ṭha zawka kalpui dan tur sawiho a ni.

Social justice delivery kawnga mipui nena ṭanhona ṭha zawk neih theih dan tur te, public private partnership mode-a kal dan turte rel a ni a; ministry hnuaia hmalakna hrang hrang SAMAVESH portal te, NMBA 2.0 apps te, SETU apps te, SMILE apps te bakah beggar homes atana guideline-te tlangzarh a ni bawk.

Sawihona hunah hian Union minister Dr Virendra Kumar leh minister of state BL Verma bakah, state hrang hranga Social Welfare leh a kaihhnawih department changtu minister te leh department official-te an tel. Mizoram aṭangin Social Welfare secretary Lalzarmawii, deputy director Gracy Lalchhanzuali leh PS to minister H Lalhruaitluanga te an tel a ni.