Mayor atan H Lalremtluanga ruat a ni

ZPM party chuan Aizawl Municipal Corporation (AMC) mayor atan Ward VI-a corporator atana thlan tlin H Lalremtluanga an ruat a, deputy mayor atan R Lalawmpuii leh executive corporator atan mi pali an ruat bawk.

ZPM party chuan nimin khan Vaivakawn YMA Hall-ah 'AMC-a hnehna chan lawmna' inkhawm an buatsaih a; ZPM president mawhphurhna la mektu Lalduhoma, chief minister-in kaihruaiin, minister K Sapdanga'n AMC-a ZPM kaihhruai sorkara hotu tura ruatte a puang.

Aizawl mayor turin Ward VI (Chanmari West, Edenthar, Hunthar)-a corporator atana thlan tlin H Lalremtluanga ruat a ni a; ani hi AMC by-election 2024 khan Ward VI-ah hian thlan tlin a lo ni tawh. Deputy mayor atana ruat R Lalawmpuii, Ward XVI (Bethlehem, Bethlehem Vengthlang, College Veng) corporator ruat a ni a, ani hi kum 2021-a AMC inthlanpuiah khan thlan tlin niin, kumina inthlanpuiah general seat-ah thlan tlin leh a ni.

Executive corporator atan Ward VIII aṭanga a záwna thlan tlin Christina Roluahpuii Sailo bakah, vawi khatna atana thlan tlin - Vanlalhruaia (Ward XIII), Vanlalfaka (Ward III) leh K Lalrodinga (Ward XVIII) te ruat an ni bawk.

AMC hmasa ber, Aizawl Municipal Council (2010-2015)-ah khan thlan tlinte chu councillor tih niin, chairman leh vice chairman ten an kaihruai. Kum 2015 aṭangin Aizawl Municipal Corporation tih niin, chairman leh deputy chairman te chu mayor leh deputy mayor tih an ni a; a hnu deuhah thlan tlinte chu corporator tih ve leh an ni.

AMC sorkar awm tawhteah khan chairman/mayor leh vice chairman/deputy mayor te mipa vek an ni ṭhin a, tuna ZPM kaihhruai AMC sorkarah chuan deputy mayor atan hmeichhia ruat niin, hmeichhia deputy mayor hmasa ber a ni ang.