Thli vangin in eng emaw zat a chhia

April 27, Thawhṭanni leh nimina thli tleh vangin Mizoram hmun hrang hrangah chenna in, biak-in, sikul leh damdawi-in eng emaw zat a chhia.

Disaster Management & Rehabilitation department aṭanga thu dawn danin, chhiatna thlen nasatna hmun Sialsukah chuan chenna in pahnih a chhe vek a, in paruk chu chhe vek lo mah se, nasa takin a chhia a, a ṭhenlai a chhia in 12 a awm. Chenna in bakah ran vulhna in 11 a chhe bawk.

Buarpui khuaah chuan chenna in pathum a ṭhen lai a chhia a, Anganwadi Centre-IV, BCM Ramhlun Sunday School, BCM Ramhlun Chawlhbuk, BCM pastor quarters leh High School building a ṭhen lai a chhia a ni.