KHAWTHLIR

HSSLC result

Mizoram Board of School Education chuan vawiin chhun dar 12 hian Higher Secondary School Leaving Certificate Examinations 2026 result a tichhuak dawn. Result hi MBSE Office, Chaltlang leh Regional Office, Lunglei bakah, website pahnih - www.mbse.edu.in leh www.mbseonline.com ahte en theih a ni ang. Office hun chhungin whatsapp/phone call hmangin phone number 9366278842/9863722521 leh 9863519718/ 9612226288-ah zawhfiah theih a ni bawk.

MHIP-in lawmpui

MHIP General Headquarters chuan, Aizawl Municipal Corporation inthlan zawh takah seat 19 zinga pakuaah hmeichhia thlan tlin an ni chu lawmawm an tih thu an tarlang. MHIP Gen. Hqrs building chu sak ṭhat a nih dawn avangin May 2026 aṭangin Central YMA building-ah MHIP pisa sawn a nih rih dawn thu an tarlang bawk.

Hriselna kutpui

May 14-15, 2026 chhunga Serchhip DC pisa tuala neih tur Hriselna Kûtpui buatsaih dan tur ngaihtuahin nimin khan Serchhip bawrhsap Paul L Khuma hoin thuneitute an ṭhukhawm. Ruihhlo vanga Mizoram ṭhalaite buaina tihziaawm a nih theihna atan te, ruihhlo ṭhat lohzia inzirtirna atan leh ṭhalaite’n rilru dik an put theihna tura inzirtirna atan kût hi buatsaih tum a ni.

Green-Ag sawiho

Mamit bawrhsap Suvigya S Chandra hoin nimin khan DC conference hall-ah Green-Ag project 9th Technical Support Group an ṭhu a; kum 2026-27 chhunga Green Landscape Management Plan thlirho niin, line department-te nena thawhho theih dan tur an sawiho. Green-Ag project hi kum 2019 khan Mizoramah ṭan a ni a; Dampa Tiger Reserve leh Thorangtlang Wildlife Sanctuary bul hnai khaw 38 a huam.

Harsatna enfiah

Principal chief conservator of forests Rajeev Kumar Tiwari chuan tun hnai khan Kawrthah Forest Division a tlawh a; Luimawi leh Bungṭhuam khua, ramri bula teak thing kih rûk leh tawlh rûk chungchanga harsatna awmte a hmunah a enfiah bawk.