A huna vote chhiar theih loh chhiar a ni

AMC Ward I chhunga Zuangtui-II Polling Station-a vote tlate chu vote chhiar hun pangngai, April 27, 2026 khan EVM-ah vote hmuh zat a lan theih loh avangin nimin khan State Election commissioner Dr H Lalthlangliana pisaah chhiar a ni a, ṭha takin vote tla zat a lang.

Nimina vote chhiarnaah hian sorkar official te, political party leh candidate-te agent-te leh MJA hruaitute an tel a; Zuangtui-II PS-a vote thlakna atana hman electronic voting machine (EVM Control Unit Serial Number Z07457) chu EVM siamtu BEL engineer Laxman Khot-a'n buaipuiin, langtlang takin vote chhiar a ni.

Zuangtui-II PS-ah hian vote 644 a tla a; ZPM candidate Vanlalhriata'n vote 268, MNF candidate CL Biakhlua'n vote 254, INC candidate Laldinpuii'n vote 110 leh BJP candidate R Lalhmingmawia'n vote 9 an hmu a, NOTA-ah vote 3 a tla bawk.

Heti hian vote tla zat chu 8,959 a ni a; Ward I-a thlan tlin tak Vanlalhriata'n vote 4,409, CL Biakhlua'n 2,809, Laldinpuii'n 1,652 leh R Lalhmingmawia'n 62 an hmu a, NOTA-ah vote 27 a tla a ni.

Tarlan tawh angin, Zuangtui-II PS-a vote tlate April 27 khan chhiar theih ni lo mah se, Ward I-a vote hmu sang ber leh a dawttu inthlauhna vote 1,586 a ni a, Zuangtui-II PS-a vote tla zat 644-in result a tihdanglam phak loh avangin vote hmu sang ber Vanlalhriata chu April 27 khan tlingah puan nghal a ni.

State Election commissioner Dr H Lalthlangliana chuan nimina vote chhiar chungchangah, "Langtlang taka tih kan duh avangin vote chhiar dan pangngaia kan tih dan ang ni loin hetiang hian kan ti a, thlalak pawh phal a ni," a ti.

Dr H Lalthlangliana chuan, AMC inthlan felfai taka zawh a ni chu lawmawm a tih thu sawiin, "Tih fuh loh palh a awm thei a, la inthlang zel tur kan ni a, thurawn kan dawng thei reng a ni," a ti a; inthlan vuakveta thuthar thehdarhtute ṭawiawmnaah an lawm thu a sawi.