PMUY kalpui danin duhthu a sâm lo

Lawngtlai bawrhsap Donny Lalruatsanga kaihhruaiin nimin khan District Committee on Pradhan Mantri Ujjwala Yojana (PMUY) chu DC conference hall-ah an ṭhukhawm a; Lawngtlai district-a PMUY kalpui danin duhthu a sam loh thu sawi lan a ni.

Lawngtlai Bawrhsap chuan, PMUY hnuaiah BPL chhungkuaa hmeichhiate tan a thlawna gas (LPG) connection pek ṭhin a nih angin, Lawngtlai district-a kalpui danin duhthu a sam loh hle thu a sawi a, "PMUY emaw, scheme ṭha zawk pawh kalpui leh a nih chuan ṭha zawk leh changtlung zawka kalpui a pawimawh," tiin, gas agency-te inpuahchah ṭha turin a chah.

LPG cylinder hman nasat a nih tawh thu sawiin Donny Lalruatsanga chuan, "Hei hian chhungkaw khawsak a tizângkhai hle. Gas agency-te'n la hmang ve thei lote zawn chhuah leh connection pek kawngah theihtawp an chhuah chhunzawm zel a pawimawh," a ti.

Lawngtlai district civil supply officer Lianchhuma Chinzah tarlan danin, Lawngtlai district-ah gas agency pali an awm a, chung zingah chuan Nuteii Gas Agency, Chawngte-in free gas connection 2,554 pe tawhin, Lawngtlai district-a ti ṭha ber a ni.