Mizoramah Covid-19 vei mek 8 awm

Health & family Welfare department hnuaia Integrated Disease Surveillance Programme (IDSP) chuan Mizoramah Covid-19 vei mek mi pariat an awm thu tarlangin, Covid-19 chungchanga mipui hriat tur an tichhuak.

Mizoram ISDP chuan, hun eng emaw chen Covid-19 vei an awm tawh loh hnuah, tun hnaiah kai thar an awm leh nual thu a tarlang a, "Covid-19 hi a la reh lo a, a khát tâwka rawn lan chhuah cháng a nei ṭhin. He natna laka kan him theih nan theihtâwpa kan fimkhur tlan a ṭul. He natna hi inkai darh awlsam tak leh fimkhur ngai tak a ni a, mipuite kan fimkhur nan invênna turte hi zawm ngei tûrin kan inhriattir a ni," a ti.

ISDP tarlan danin, Mizoramah nimin thleng khan Covid-19 vei leh vei loh mi 19,98,442 endik a ni a, Covid-19 vei mi 2,39,710 hmuh chhuah niin, mi 734 an thihpui. Mi 2,38,968 enkawl dam tawh niin, enkawl mek mi pariat an awm a ni.