Autism Acceptance Month hmang

April thla hi Autism Acceptance Month a ni a, hemi pual hian nimin khan Autistic Community, Mizoram huaihawtin Gilead Special School-ah hun hman a ni.

Autism Acceptance Month hmanna inkhawm hi Autistic Community Mizoram president Lalbiakfela'n a kaihruai a; autistic nu leh pa aiawh leh Gilead Special School-a autism enkawltu H Lalbiakdiki ten an tawnhriatte an sawi a, Gilead Special School-a autism naupangte'n hun an hmang bawk.

Inkhawmah hian autism naupangte leh an chhungte'n harsatna an tawhte an sawi a; autism naupang an pun zel thu te, an harsatnate mipuiin an hriatthiama an pawm thiam a ṭul thute an sawi. Autistic Community, Mizoram hi kum 2025 khan din a ni a, tunah hian member 216 an awm a ni.