Naupang kum 5 hnuai lamte Aadhaar card siamsak dan zirho

National Health Mission chuan sorkar damdawi-in hrang hranga nau piang hlim aṭanga kum 5 hnuai lamte Aadhaar card siamtu Birth Registration Based Aadhaar Enrollment (BRBAE) khawihtu (operator)-te pualin Health Services conference hall-ah training an buatsaih.

Training hmanpuitu NHM mission director Dr R Lalchhuanawma chuan, sorkar leh Unique Identification Authority of India (UIDAI) duh angin damdawi-ina nau piang birth certificate siamte chu Aadhaar card siamsak zel tur a nih thu sawi.

Dr R Lalchhuanawma chuan, BRBAE operator-te'n naupang kum 5 hnuai lam Aadhaar card la nei lo pawh birth certificate an neih tawh a, India khua leh tui nihna nei an nih chuan Aadhaar card an siamsak theih thu a sawi a; tuna BRBAE operator awm tawhte bakah, damdawi-in dang 22-ah operator dah belh a nih dawn thu a sawi bawk.

NHM-a Hospital Management Information System (HMIS) nodal officer Dr B Lalthantluanga chuan, BRBAE operator-te'n kum 5 hnuai lamte Aadhaar card siam bakah, mobile phone number Aadhaar number nena inzawmtir an tihsak theih thu a sawi.