West Bengal state assembly inthlanpuiah Mizoram police 1,178-in venhim hna thawk

West Bengal Assembly inthlanpui neih mekah venhimna hna thawk turin Mizoram police ṭhahnem tak tirh an ni a, ṭha takin venhimna hna an thawh bakah, a ṭul angin vote thlak turte an pui ṭhin.

Police hotute hnen aṭanga thu dawn danin, April 9, 2026-a Assam state assembly inthlanpuiah Mizoram armed police battalion khat chu venhimna hna thawkin an kal a, chungte chu West Bengal inthlanpuiah duty tura an kal tlang nghal bakah, Mizoram aṭangin battalion pakhat dang tirh belh an ni.

West Bengal inthlanpuia Mizoram police duty-te chu battalion hnih anga ngaih niin, company 15 an ni a, an vaiin 1,178 an ni. Mizo State Armed Police (Mizo SAP) tia koh an ni a, Mizorama silai keng police (armed police) battalion pariat (MAP battalion pathum leh IR battalion panga) aṭanga pawh khawm an ni.

Mizoram police duty-te hi an ṭangkai hle a, venhimna hna an thawh bakah, vote thlâk tura polling station pantu upa leh taksaa harsatna neite an theih ang angin an ṭanpui thin.

Pathianni zingah Pathian biak inkhawm (devotion) neiin, thawhlawm an la khawm ṭhin a; an thawhlawmte chu Kolkata Pastor bialah leh Calcutta Mizo Welfare Association-ah an chhûng lut ṭhin a ni.

MLA 294 awmna West Bengal inthlanpui vote thlak hi April 23, 2026 khan a thawh khatna neih niin, nimin khan vote thlak thawh hnihna neih a ni a; May 4, 2026-ah vote chhiar a ni ang.

WEST BENGAL-A MIZO SAP DUTY ZAT

1. Adhoc Commandant - 2

2. Adhoc 2nd CO - 2

3. Medical officer - 2

4. Assistant CO - 12

5. Inspector - 17

6. Sub-Inspector - 47

7. Assistant SI (MPRO) - 10

8. Havildar - 288

9. Head Constable (MPRO) - 7

10. Naik - 233

11. Constable - 494

12. Cook - 64

TOTAL - 1,178