HSSLC 2026-ah zirlai 10,734 an hlawhtling

Mizoram Board of School Education (MBSE) chuan nimin chhun dar 12 khan Higher Secondary School Leaving Certificate (HSSLC) Examinations 2026 result a tichhuak a, zirlai exam 12,243 zinga 10,734 hlawhtlingin, pass percentage 87.67% a ni. Stream pathumah St. Paul's Higher Secondary School zirlaite'n mark an hmu sang ber.

HSSLC Examination 2026-ah hian zirlai hlawhtling 10,734-te chu mipa 4,915 leh hmeichhia 5,819 an ni a; compartmental chance nei zirlai 115 an awm a, zirlai 1,394 an fail thung. Exam hmachhawntu zirlai 12,243-te chu regular student 12,166 leh private candidate 77 an ni a; regular student zingah 10,677 (87.76%) pass in, private candidate zinga 57 (74.03%) an hlawhtling a ni.

Thu dawn danin, Arts, Science leh Commerce stream-a pakhatnate chu St. Paul's HSS zirlai vek an ni a; Arts-ah Lalnunhlui, Melthum pakhatna niin, mark 466 a hmu a, Science-a pakhatna Lalmoipuia Lawmzual, College Veng, Aizawlin mark 462 hmuin, Commerce-a pakhatna Vanlaltleipuia, Lungleiin mark 463 a hmu. Science-a pakhatna Lalmoipuia hi HSLC 2024-ah pakhatna a lo ni tawh.

Mizoram sorkar thutlukna angin, kumin aṭangin HSLC leh HSSLC result-ah zirlai ti ṭha zualte leh zirlai pass-te division leh letter hmuh dan tarlan a ni lo a, sikul hming hnuaiah zirlai pass-te hming leh roll number chiah tarlan a ni. He kalphung hi CBSE, CISCE leh state tam takin an kalpui dan a nia sawi a ni a; zirlaite mark hmuh dan kimchang chu an certificate-ah tarlan niin, MBSE website aṭangin en theih a ni bawk.

ARTS DINHMUN

Arts-ah hian zirlai exam 8,714 awmin, mi 7,575 an hlawhtling a, pass percentage 86.93% niin, stream pathum zinga pass percentage hniam ber a ni.

Arts-a zirlai exam-te chu mipa 4,077 leh hmeichhia 4,637 niin, mipa 3,539 (86.8%) leh hmeichhia 4,036 (87.04%) an pass a, mipa aiin hmeichhe pass percentage a sang. Zirlai 93 (mipa 35 leh hmeichhia 58)-in compartmental chance an nei a; zirlai 1,046 hlawhchhamin, mipa 503 leh hmeichhia 543 an ni.

SCIENCE DINHMUN

Science-ah zirlai 2,770-in exam an hmachhawn a, an zinga 2,472 pass-in, pass percentage 89.24% a ni.

Exam hmachhawntu mipa 1,149 zinga 1,031 (89.81%) leh hmeichhia exam 1,622 zinga 1,441 (88.84%) an hlawhtling a; hmeichhia aiin mipa pass percentage a sang zawk. Compartmental chance nei zirlai 13 (mipa paruk leh hmecihhia pasarih) an awm a, zirlai hlawhchham 285 (mipa 111 leh hmeichhia 174) an awm.

COMMERCE DINHMUN

Commerce-ah zirlai exam 759 zinga 687 an hlawhtling a, pass percentage 90.51% niin, stream pathum zinga pass percentage sang ber a ni.

Zirlai exam hmachhawntu mipa 380 zinga 345 (90.79%) leh hmeichhia 379 zinga 342 (90.24%) an pass a; mipa pass percentage hi 0.55%-in a sang zawk. Zirlai hlawhchham 68 (mipa 28 leh hmeichhia 35) an awm a, compartmental chance nei zirlai mipa pasarih leh hmeichhia pahnih an awm bawk.

DINHMUN ṬHENKHAT

■ Exam centre 103-ah zirlai 12,399 an exam a, zirlai 10,734 an pass.
■ Mipa aiin hmeichhia exam 1,033-in an tam zawk a, pass zat pawh mipa aiin hmeichhia 904-in an tam.
■ Arts-ah Serchhip district pass percentage a sang ber a, 91.86% a ni.
■ Science-ah Kolasib district pass percentage sang berin, 94.59% a ni.
■ Commerce-ah Hnahthial district aṭanga zirlai exam zawng zawng an pass vek.
■ Arts-a mark hmu sang berin 466 a hmu a, Science-ah 462 leh Commerce-ah 463 a ni.